Unha vez coñecidos os resultados da campaña electoral máis mediática e tensa dos últimos anos, 23 galegas e galegos terán o deber de representar a Galiza no Congreso dos Deputados e 16 no Senado. Coñecemos quen é cada quen:
A Coruña
Pilar Cancela Rodríguez (PSdeG)
Nada en Stuttgart, en 1967.
De nai e pai emigrantes, viviu de pequena entre Alemaña e Venezuela. Estudou Dereito na USC e é funcionara de carreira no corpo superior da administración galega.
Xa resultara electa deputada do Congreso na anterior lexislatura e integra a comisión executiva federal do PSOE.
Pablo Arangüena Fernández (PSdeG)
Naceu na Coruña en 1973.
É avogado en exercicio na Coruña. Foi o letrado que denunciou en 2011 as irregularidades nas prexubilacións dos antigos directivos de Novacaixagalicia.
É vicepresidente da Asociación Libre de Avogados de Galiza e foi técnico de comercio exterior na oficina comercial da embaixada de España en México.
Participa en diversos medios de comunicación e é vicesecretario xeral do PSdeG.
María Montserrat García Chavarría (PSdeG)
Nada en Riotorto, en 1968.
É a secretaria de Coordinación territorial do PSdeG na Coruña, ademais de concelleira e portavoz municipal do seu partido no concello das Pontes.
Tamén foi deputada provincial desde o 2007 até 2015.
Marta González Vázquez (PP)
Naceu en Santiago, en 1965.
É licenciada en Historia e doutora na especialidade de Historia Medieval. En 2003 incorporouse á Xunta como directora xeral do Servizo Galego de Igualdade, do que en 2009 foi secretaria xeral.
Foi deputada pola Coruña durante as X, XI e XII lexislaturas. Actualmente é a vicesecretaria xeral de comunicación do PP.
Tristana María Moraleja Gómez (PP)
Naceu en 1971 en Lugo.
É deputada no Congreso pola Coruña desde 2011 e licenciada en Ciencias Económicas e Empresariais. Conta cun mestrado en Administración Financieira e Tributaria. É xefa territorial da Consellaría de Economía e Industria na Coruña.
María Valentina Martínez Ferro (PP)
Naceu en Santiago de Compostela en 1976.
É licenciada en Ciencias Políticas e da Administración e conta cun mestrado en Estudos Europeos pola Universidade Católica de Lovaina. Ademais tamén é diplomada polo Institut d’ Etudes Politiques.
Foi deputada do Partido Popular por Madrid desde 2011 e portavoz adxunta na Comisión de Cooperación. Foi membro da Comisión de Asuntos Exteriores do Congreso.
Antón Gómez Reino (En Común-Unidas Podemos)
Naceu na Coruña en 1980.
É o actual secretario xeral de Podemos en Galiza e desde 2015 ten escano coma deputado nas Cortes Xerais (daquelas pola candidatura de En Marea). É técnico de laboratorio en bacteroloxía.
Traballou como autónomo durante anos xestionando unha pequena tenda e despois xestionado unha produtora alternativa do ámbito musical. Forma parte da Marea Atlántica na Coruña.
Marta Rivera de la Cruz (Ciudadanos)
Naceu en Lugo en 1970. É licenciada en Ciencias da Información e especialista en Comunicación Política pola Universidade Complutense de Madrid.
Foi deputada por Madrid na anterior lexislatura do Congreso, representando a Ciudadanos. É escritora en lingua castelá e colaboradora en diversos medios de comunicación. Foi un dos apoios máis salientados da asociación galegófoba Galicia Bilingüe.
Lugo
Ana Prieto Nieto (PSdeG)
Veciña de Lugo e nada en Xinzo de Limia en 1965.
É licenciada en Farmacia pola Universidade de Santiago de Compostela, e chegou a ser presidenta do Colexio de Farmacéuticos de Lugo.
É a primeira tenente de alcalde da cidade amurallada e titular da área de Economía, Emprego e Desenvolvemento Económico, ademais de secretaria de Estudos e Programas da executiva do PSdeG.
Sonsoles López Izquierdo (PSdeG)
Naceu en Lugo en 1974.
Estudou Enxeñaría Técnica Forestal na Escola Politécnica da capital luguesa, onde ademais é concelleira e portavoz do PSdeG.
Entrou na corporación da Deputación no 2011, onde foi responsábel da área de Medio Ambiente e Enerxías Renovábeis e actualmente é deputada da área de Promoción Económica e Social.
Jaime Eduardo de Olano Vela (PP)
Naceu na Coruña en 1970.
É licenciado en Dereito e avogado, ademais de concelleiro en Viveiro desde o 2011, ano en que tamén entrou como deputado no Congreso. Foi portavoz do PP na Comisión de Orzamentos do Congreso e portavoz adxunto do grupo parlamentario na cámara baixa.
Joaquín García Díez (PP)
Naceu en Ferrol, en 1954.
É licenciado en Ciencias Biolóxicas. Foi secretario xeral da Consellaría de Agricultura e Montes (1990-1991), ademais de tenente de alcalde do concello de Lugo e concelleiro delegado das áreas de Economía e Medio Ambiente (1991-1995). Posteriormente foi o alcalde de Lugo (1995-1999).
É membro da xunta directiva do PP de Lugo e de Galiza, ademais de deputado no Congreso desde o ano 2004.
Ourense
Marina Ortega Otero (PSdeG)
Naceu no Carballiño en 1983.
É psicóloga e vogal da xunta de goberno do Colexio Oficial de Psicoloxía de Galiza.
Exerce como concelleira de Servizos sociais, igualdade e sanidade no concello do Carballiño desde o ano 2015; e ademais é secretaria da área de Política social da executiva do PSdeG.
Adolfo Pérez Abellás (PSdeG)
Naceu en Amoeiro en 1952.
Traballa como profesor contratado doutor na Universidade de Vigo. É tamén mestre de ensinanza de primaria, licenciado e doutor en Psicopedagoxía pola UVigo. Actualmente é presidente do Comité de Ética do PSdeG de Ourense e membro do seu comité local.
Ana Belén Vázquez (PP)
Naceu en Bande en 1975.
É licenciada en Dereito e funcionaria do corpo superior da administración local. Encabezou a candidatura do PP por Ourense ao Congreso. Conta con experiencia nas Cortes Xerais, xa que foi deputada desde o ano 2000.
Foi elixida concelleira no concello de Bande nas eleccións municipais de1995, renovando o cargo en 1999 e 2003. Ocupou o cargo de concelleira de Cultura e Deporte, e posteriormente pasou a ser segunda tenente de alcalde. En 2006 foi elixida alcaldesa de Bande.
Celso Luis Delgado Arce (PP)
Naceu en 1958.
Deputado no Congreso desde o ano 2000, é licenciado en Dereito pola Universidade de Santiago de Compostela. É avogado e ten un mestrado en Dirección de Empresas e Distribución Comercial.
Foi deputado e vicepresidente primeiro do Parlamento de Galiza de 1997 ao 2000.
Pontevedra
Ana María Pastor Julián (PP)
Naceu en Cubillos (Zamora) en 1947.
Licenciouse en Medicina pola Universidade de Salamanca e é funcionaria do corpo superior de saúde pública do Estado.
Desde 2016 é presidenta do Congreso dos Deputados e foi anteriormente ministra de Sanidade e Consumo (2002-2004) e de Fomento (2011-2016).
Diego José Gago Bugarín (PP)
Naceu en Vigo en 1987.
Licenciado en Dereito Económico, é concelleiro en Vigo e presidente de Novas Xeracións a nivel galego desde 2014 e a nivel estatal desde 2017.
María Olga Alonso Suárez (PSdeG)
Naceu no concello de Cotobade en 1962.
É diplomada en Maxisterio e licenciada en Filosofía e Ciencias da Educación. Traballa como mestra e directora do centro educativo público Frián de Teis, en Vigo, cidade onde é concelleira de Educación. Foi ademais a primeira muller en ser secretaria comarcal dun sindicato en Vigo (UXT).
Guillermo Meixón Couselo (PSdeG)
Nado en Pontevedra no ano 1958.
É mestre e orientador escolar, con licenciatura en Filosofía e Ciencias da Educación.
Foi concelleiro en Pontevedra entre 1999 e 2005 e deputado no Parlamento de Galego desde 2005 a 2011. Tamén tivo escano no Congreso entre 2011 e 2019.
É membro de FETE-UXT, onde desempeñou distintos cargos nas executivas comarcais, provincial e galega. No PSdeG ocupou a secretaría xeral da agrupación local de Pontevedra, a secretaría de educación e a de política institucional na executiva galega.
Ángeles Marra Domínguez (PSdeG)
Naceu en Vigo no ano 1966.
É doutora en Ciencias Económicas e Empresariais e profesora titular de Teoría Económica na Universidade de Vigo. Actualmente é concelleira de Transportes e Proxectos Estatais e Europeos en Vigo.
Foi senadora por Pontevedra durante a X lexislatura (2011-2015).
Yolanda Díaz Pérez (En Común-Unidas Podemos)
Naceu en Fene en 1971.
É avogada de profesión. Estivo vinculada ao movemento de esquerdas desde moi nova. Foi coordinadora de Esquerda Unida, concelleira en Ferrol desde 2003 a 2011 e deputada do Parlamento galego na anterior lexislatura con AGE. Foi tamén deputada no Congreso desde 2015 (por En Marea pola Coruña) e agora en representación de En Común-Unidas Podemos por Pontevedra.
Beatriz Pino (Ciudadanos)
Naceu en Vigo en 1975.
É licenciada en Xornalismo pola Universidade Carlos III de Madrid, e voltou a Galiza após traballar en Telemadrid e Antena 3 como xornalista.
Coñece ben a organización e ideoloxía de Ciudadanos, xa que foi a responsábel de comunicación do partido na Galiza.
SENADO 2019
A Coruña
Antonio Vázquez Lorenzo (PSdeG)
Naceu en Betanzos, o 27 de outubro de 1956. É técnico de construción e concelleiro desde 1995.
Obdulia Taboadela Álvarez (PSdeG)
Naceu en Madrid en 1964.
É doutora en Socioloxía pola Universidade Complutense de Madrid e experta e responsabilidade social e innovación social, ademais de traballar como profesora e investigadora universitaria especialista en mercado de traballo, migracións internacionais e estudos de xénero. Foi subdelegada do Goberno, concelleira e tenente de alcalde na Coruña
Xullo Barros Casal (PSdeG)
Nado en Mugardos en 1962.
É licenciado en Dereito pola USC e avogado en Ferrol desde 1987. Ademais é membro da xunta de goberno do Colexio de Avogados de Ferrol desde 2014 e secretario de Estudos e Programas da executiva local do PSdeG.
Miguel Lorenzo Torres (PP)
Naceu en Pontevedra en 1961.
Licenciouse en Dereito e é avogado e profesor universitario na USC. Concelleiro. Foi concelleiro de goberno na Coruña co Partido Popular e deputado no Congreso de 2015 a 2019.
Lugo
José Manuel Barreiro Fernández (PP)
Naceu en Lugo en 1957.
Foi deputado no Parlamento galego desde 1997 a 2007 e na Deputación de Lugo desde o 2007. Ademais, de conselleiro de Medio Ambiente da Xunta de Galiza (2003-2005) tamén escano de senador desde o 2008.
Rosa María Arza Rodríguez (PP)
Concelleira en Quiroga e presidenta local de Novas Xeracións do Partido Popular.
Manuel Lorenzo Varela Rodríguez (PP)
Ostentou a alcaldía de Chantada desde 1995 a 2007. Despois de non ser proposto polo PP para encabezar as municipais formou a candidatura Independentes Terras do Asma (INTA) coa que recuperou a alcaldía. Posteriormente retornou ao PP e agora estréase como senador.
César Mogo Zaro (PSdeG)
Nado no Valadouro. É Licenciado en Ciencias Políticas e Socioloxía.
Foi director do Gabinete da secretaria de Estado de inmigración e emigración e director do gabinete do Ministerio da Presidencia nos gobernos de Zapatero
Ourense
Miguel Ángel Viso Diéguez (PP)
Naceu en Arnoia en 1971. É deputado desde 2015 e é técnico superior en prevención de riscos laborais. Expresidente do Consello Regulador do Ribeiro.
María del Carmen Leite Collado (PP)
Nada en Vigo en 1953. É médica e foi alcaldesa do concello de Cartelle desde 1991 até 2017. Ten acta de senadora por Ourense desde o ano 2008.
Francisco Fernández Pérez (PP)
Naceu en Cortegada en 1959. É senador desde 2011 e anteriormente foi concelleiro (1991) e desde 1995 é o alcalde de Leiro.
Juan Carlos Francisco Rivera (PSdeG)
Naceu en Verín en 1968.É avogado, dono do despacho J@M e copropietario dunha empresa de recadación de tributos locais. Ocupa a secretaría de organización do PSdeG de Ourense.
Pontevedra
Modesto Pose Mesura (PSdeG)
Naceu en 1955 en Malpica. É licenciado en Medicina e traballa como inspector médico en Pontevedra.
María Margarita Peregrina Adrio (PSdeG)
Naceu na Coruña en 1956. É licenciada en Dereito e diplomada en Criminoloxía pola Universidade de Santiago Avogada en exercicio, é presidenta da Comisión penitenciaria do servizo orientación xurídica penal do Colexio de Avogados de Pontevedra.
Daniel Chendo Padín (PSdeG)
Naceu en Caldas de Reis en 1953. É licenciado en Ciencias Políticas e da Administración pola Universidade de Santiago de Compostela. A súa praza como profesor atópase non IES de Valga (Pontevedra). Foi secretario xeral do PSOE en Pontecesures.
Miguel Fidalgo Iglesias (PP)
Naceu en Vigo en 1971. É economista e foi concelleiro do Partido Popular en Vigo até o 2015, ano en que se presentou ao Senado e gañou a acta.