A Executiva provincial do PSOE de Ourense avogou por negociar co líder de Democracia Ourensá e alcalde en funcións de Ourense, Gonzalo Pérez Xácome, para apartar o popular Manuel Baltar da presidencia da Deputación.
Nunha reunión decorrida na tarde da terza feira e á que acudiron unhas 40 persoas, a Comisión Executiva do PSOE de Ourense acordou manifestar o seu posicionamento político e sinalar que están ante unha "obriga histórica" para lograr un goberno de cambio na Deputación, para o que a estrutura provincial apoia de forma "unánime" o inicio das negociacións.
A Executiva provincial tamén subliñou o seu respaldo ao secretario xeral provincial, Rafael Rodríguez Vilariño, como "interlocutor natural" nestas negociacións que teñen como obxectivo apartar Baltar da Deputación e lograr un goberno de cambio, fin para o que tamén se necesitaría falar co Bloque Nacionalista Galego.
Fontes socialistas presentes na cita política explicaron que o obxectivo é "marcar a posición" para abrir un espazo de diálogo pero subliñan que as conversas aínda non se iniciaron. "A percepción do partido é unánime, non hai punto de desencontro", sinalan.
Estas fontes explicaron, así mesmo, que esta quinta feira terá lugar unha reunión da Executiva do PSdeG, na cal os socialistas abordarán este asunto para "a partir de aí traballar na procura dun espazo de encontro". Con todo, outras fontes inciden en que, ao ser un tema que "afecta a provincia", a decisión "deberíaa tomar o PSOE de Ourense".
Tamén aseguraron que a necesidade "chegar a acordos tanto co BNG como con Democracia Ourensá" para apartar a Baltar da Deputación "é un clamor" e lembraron que "fai catro anos tentouse pero non se conseguiu".
A dirección galega non está de acordo
Pola súa parte, preguntadas por este asunto, fontes da dirección do PSdeG subliñaron que o Partido Socialista da Galiza "non contempla negociar nada con Xácome" e lembran que é a dirección galega a encargada de propor e liderar os marcos dos acordos con outras forzas, e mesmo a responsábel de propor posíbeis presidentes, cuxo nome debe ser aprobado pola comisión federal de listas.
Ademais, explicaron que na reunión desta quinta feira abordarase a situación política de Ourense, para a que o PSdeG "non descarta ningún tipo de escenario, pero tampouco vai entrar nunha poxa de institucións". "Van valorar diferentes opcións, tanto para o Concello como para a Deputación, sen descartar ningunha combinación de acordo", apuntaron.
"É a dirección do PSdeG quen ten que propor posíbeis presidentes e en Ourense non se descarta ningún escenario nin posibilidade de chegar a acordo pero, en todo caso, non se contempla negociar con Xácome nada", deixaron claro.
Acordos co BNG
Por outro lado, preguntadas respecto diso, a dirección do PSdeG lembrou que na reunión tamén se analizará a posibilidade de estabelecer un acordo marco co BNG para impulsar gobernos de progreso.
Conforme lembrou, trátase dun acordo marco que "existiu moitas veces para facilitar a formación de gobernos". "O máis urxente é facilitar investiduras de alcaldes e alcaldesas progresistas onde as fórmulas o permitan e onde non haxa maiorías do PP", sinalou.
