O PSOE fica só defendendo no Congreso o plan do Goberno español para a eólica mariña

A comparecencia da ministra de Transición Ecolóxica, Teresa Ribera, no pleno do Congreso dos Deputados para explicar a proposta do Goberno español en relación coa eólica mariña evidenciou a soidade dos socialistas nesta materia. Neste sentido, a vicepresidenta terceira do Executivo non atopou apoios fóra do PSOE aos Plans de ordenación dos espazos marítimos (POEM), que foi contestado por todo o abano ideolóxico da Cámara. Rego exixe a Teresa Ribera retirar os POEM para "salvar a actividade pesqueira e os ecosistemas" Ribera afirmou que “a planificación será favorábel para os novos sectores e, tamén, para os sectores clásicos”, asegurando que “a única maneira de manter a pesca do futuro é apostando pola biodiversidade”. Porén, recoñeceu que a eólica mariña “non é compatíbel con todas as artes da pesca”, sinalando explicitamente a súa incompatibilidade co arrastre e o palangre, artes que ocupan importantes segmentos de frota no país. Aínda así, destacou as oportunidades que se abrirían coa eólica mariña para “Galiza, que vería como se crean centos de postos de traballo na industria e nos estaleiros, empregos cualificados, por iso buscamos a máxima colaboración coa empresa privada”. A soidade do PSOE As primeiras críticas ao proxecto chegaron por boca do voceiro de Pesca do PP e deputado por Lugo, Joaquín García Diez, quen recriminou a Ribera “a total oposición do sector pesqueiro aos POEM”, lembroulle “a admisión polo Tribunal Supremo dun recurso contra os POEM” e defendeu que “o único desenvolvemento posíbel é aquel que faga compatíbel a actividade pesqueira e a actividade eólica”. O deputado do BNG, Néstor Rego, autor da solicitude de comparecencia da ministra, explicou que “estamos a falar de sacrificar o sector pesqueiro e marisqueiro galego, que dá traballo a millares de persoas en toda a costa, máis se consideramos o complexo mar-industria, e o sector agrario e gandeiro”. Nesta liña, significou que “a aprobación dos POEM dan vía libre á implantación de parques de eólica mariña con graves consecuencias que tería para os ecosistemas mariños e para caladoiros importantes da nosa frota". O representante de Unidas Podemos e parlamentario pola Coruña, Antón Gómez-Reino, recoñeceu” a importancia de regular a implantación da eólica mariña” pero exixiu “unha moratoria no seu desenvolvemento en determinadas zonas, onde se poden xerar danos irreparábeis para a biodiversidade e a actividade pesqueira”. Nesta dirección, defendeu fixar “zonas en exclusiva para a pesca” e “abrir unha vía de diálogo con aqueles sectores directamente afectados”. O Supremo admite o recurso do sector pesqueiro contra os plans de eólica mariña O único apoiou para o Executivo chegou da man da deputada socialista pola Coruña e persoa de máxima confianza de Valentín González Formoso, Montserrat García Echevarría. Sinalou que “a comparecencia da ministra serviu para desmontar mentiras e novas falsas en relación coa eólica mariña” e cargou contra o BNG por “non comprometerse coa transición ecolóxica”, situarse no “non” e “non estar nunca nas cuestións importantes da lexislatura". Espazo POEM Os POEM reservan para a eólica mariña 2.350 km2 emprazados nas augas galegas, definindo cinco zonas para o desenvolvemento desta actividade. A primeira delas, NOR-1, emprázase a 22,3 quilómetros de Vigo e do Baixo Miño. NOR-2 e NOR-2 sitúanse a 22,3 km de Ortegal, NOR-ñ4 entre esta comarca e A Mariña e NOR-5, cunha superficie próxima a 350 km2, no litoral desta última comarca. A potencia eólica mariña solicitada na Galiza achégase a 5.805 megawatts. A maior densidade de proxectos concéntranse na costa cantábrica, con peticións de autorizacións para seis parques que suman unha contía total de 3.485 megawatts. Neste caso, a totalidade das empresas promotoras teñen a súa sede social e fiscal fóra do país, asentándose a maioría delas en Madrid. As empresas promotoras Seis empresas pelexan pola eólica mariña do país. Iberdrola promove dous parques na área da Mariña e Ortegal cunha potencia total de 980 megawatts (MW). Ferrovial, a multinacional da familia Del Pino, solicita unha concesión na Mariña e outra fronte a Vigo cunha capacidade de xeración de 1.005 MW. Capital Energy, a empresa do ex xenro de Florentino Pérez, Jesús Marín Buezas, impulsa dúas instalacións localizadas na Mariña e nas Rías Baixas cunha potencia de 1.020 MW. Pontón pide "unidade" contra a eólica mariña e para paralizar os POEM Cobra, participada pola multinacional francesa Vinci e o grupo de Florentino Pérez ACS, promove un parque de 1.000 MW fronte a Ortegal. As madrileñas Bluefloat e Sener impulsan unha instalación de 1.200 MW entre a costa Ártabra e a de Ortegal. Abei Energy, con sede social en Córdoba, proxecta un complexo eólico de 600 MW na Mariña. A capacidade de xeración dos parques en tramitación na Galiza supera a prevista para todo o Estado español até o ano 2030. Neste sentido, a Folla de ruta da eólica mariña impulsada polo Ministerio para a Transición Ecolóxica e o Reto Demográfico (Miteco) apunta a unha potencia total para o conxunto estatal cifrada entre 1.000 e 3.000 megawatts, no mellor dos casos 2.805 megawatts menos da potencia solicitada polos operadores enerxéticos que aspiran a día de hoxe a instalarse nos diversos puntos da costa galega. PSOE e Vox bloquean no Congreso a transferencia a Galiza da AP-9 A negativa do Partido Socialista e de Vox a retirar a súas emendas ao proxecto de lei orgánica que se tramita no Congreso dos Deputados bloquea a transferencia á Galiza da titularidade e da xestión da autoestrada AP-9, tal como demandou por unanimidade en diversas ocasións o Parlamento galego. Neste sentido, os socialistas e a formación de ultradereita non atenderon a petición nesa dirección formulada esta cuarta feira por populares e nacionalistas na ponencia existente na Cámara Baixa, co obxectivo de axilizar a transferencia da Autoestrada do Atlántico. Os socialistas argumentaron a súa negativa a ceder á Galiza a titularidade AP-9 por razóns de tipo técnico. Así, motivaron a súa emenda sinalando que “a aprobación dunha lei orgánica que transfira a titularidade da infraestrutura á Administración da comunidade autónoma da Galiza podería comprometer a tramitación e aprobación por parte da Administración Xeral do Estado das bonificacións da peaxe previstas na autoestrada AP-9”. Ao tempo, na súa proposta, reservaron para o Goberno estatal a competencia de fixar o prezo das peaxes e a decisión sobre as condicións do contrato da concesionaria e a resolución dos expedientes contra esta". O Goberno español desbota rescatar a AP-9 e que sexa libre de peaxes Pola súa parte, o BNG urxiu o PSOE a “rematar a tramitación nos termos en que foi aprobada por unanimidade no Parlamento galego e non dilatar máis a súa aprobación no Congreso”. O deputado nacionalista Néstor Rego alertou de que se a iniciativa “non se tramita agora, teríamos que volver comezar”.