Nunha nova entrega da disputa entre o PSOE e o PP ourensás, os socialistas anunciaron que están a estudar tomar accións legais despois de ter acceso ao informe “demoledor” que o Consello de Contas redactou sobre a Deputación de Ourense.
O organismo de fiscalización reproba no documento que se outorgasen sen concorrencia en torno ao 80% dos contratos e subvencións do ano 2018.
O portavoz municipal dos socialistas, Rafael Villarino, que se tiña apartado da primeira liña para dar lugar a unha moción de censura dos dous partidos contra o alcalde Gonzalo Pérez Jácome (Democracia Ourensá) -pero o PP non o considerou suficiente e pediu que deixara todos os cargos-, lamentou que Ourense estea baseado “nun sistema de cadea de favores de empresas e concellos amigos que viven de Ourense e non por Ourense”.
Para o partido, o informe de Contas vén a confirmar que existe “unha trama de intereses espurios baseada nos contratos a dedo do presidente da Deputación de Ourense Manuel Baltar”.
Mesmo subliña que con este informe está a avalar a denuncia na que o PSOE “detallaba irregularidades nos contratos e subvencións da institución".
"Onde está a pluralidade da repartición equitativa e a transparencia das que presume o presidente?", preguntou Villarino antes de acusar Baltar de "tentar enganar" ao Consello de Contas falando dun hackeo informático para non dar a Conta Xeral do 2018.
Pola súa parte, o viceportavoz socialista na Deputación, Nacho Gómez, afirmou que o Consello "non é un órgano que faga informes de parte", polo que non permitirán que "Baltar siga mangoneando e corrompendo a administración pública".
