O deputado do PSdeG Abel Losada denunciou “venda de favores políticos” entre o Partido Popular e a presidenta da Federación Veciñal de Vigo, María Pérez, que se corresponderían ademais cos ataques de Pérez ao goberno municipal.
Losada solicitou ao Partido Popular que achegue unha explicación “convincente” á adxudicación por parte do Concello de Arbo, que goberna o PP, do servizo da Casa do Maior a unha cooperativa que dirixe a presidenta da Federación Veciñal de Vigo.
Asegurou ademais o deputado que xa ten solicitado información no Parlamento, mais criticou que esta foi escasa e non aclaratoria do proceso de selección por mérito e capacidade, e afirmou que "ten todo o aspecto de ser un caso de corrupción".
Desde o PSdeG afirmaron que fica constatada "a existencia de información privilexiada"
Desde o PSdeG sinalaron que fica constatada "a existencia de información privilexiada", intercambiada entre o Concello de Arbo e esta cooperativa, e denunciaron que se está a dar unha clara imaxe de "venda de favores políticos" por parte da presidenta da federación veciñal.
María Pérez negou as acusacións e convidou a Losada a dirixirse aos xulgados e vinculou as declaracións do deputado a un encontro que a propia Pérez mantivo esta segunda feira con representantes veciñais e a candidata popular ao Congreso, Ana Pastor, “co obxectivo de escoitar o movemento veciñal”, asegurou.
