O PSdeG impulsa esta iniciativa após constatar a mudanza na posición dun Feixoo que "pasou de ser pasivo" [cero transferencias até agora na súa década de goberno] durante os últimos gobernos centrais do PP a ser "reivindicativo" coa chegada de Pedro Sánchez á Moncloa, avalia o grupo parlamentar liderado por Xoaquín Fernández Leiceaga.
Leiceaga pensa que agora é o momento de formular demandas como a transferencia das competencias en materia de tráfico, sendo que en Madrid xa hai un goberno receptivo, "como ten demostrado ao desbloquear o debate sobre a transferencia da AP-9", afirma o PSdeG en nota de imprensa.
Para o portavoz socialista, Galiza arrastra "un déficit de competencias", froito da escasa vocación autonomista de Feixoo, e para superalo propón resgatar a "folla de rota" do bipartito, goberno de coalición formado por PSdeG e BNG que chegou a pactar coa daquela oposición do PP a demanda a Madrid dun paquete de até 70 transferencias.
Despregamento da Policía galega
A materialización desta iniciativa do PSdeG pasa necesariamente pola efectiva aplicación das disposicións previstas na lei da Policía galega de 2007, cuxo cumprimento ten sido bloqueado polo PP desde a chegada ao poder de Feixoo.
Tería de ser a Policía de Galicia (así denominada na iniciativa do PSdeG) a que se ocupase da vixilancia do tráfico nas vías inter-urbanas. Transitoriamente, e mentres non completar o seu despregamento en todo o territorio, a Garda Civil continuaría a operar nas estradas e auto-estradas do país.