A Corporación local do Concello da Coruña, reuniuse o 10 de marzo nunha sesión plenaria de carácter extraordinario na que se aprobaron os orzamentos municipais para o ano 2022 cos votos a favor do grupo de Goberno e da Marea Atlántica.
O PP votou en contra, mentres que o BNG e a concelleira non adscrita e militante de Podemos, Isabel Faraldo, optaron pola abstención.
O portavoz do Goberno municipal e concelleiro de Facenda, José Manuel Laxe Tuñas, defendeu que os orzamentos "inclúen" propostas de todos os grupos e afirmou que o que se dirimía na votación "non é o apoio a un Goberno, é un apoio á cidadanía".
A portavoz da Marea Atlántica, que tamén apoiou as contas, María García, destacou que as consecuencias da crise sanitaria estanse "vendo agravadas" pola "brutal invasión" de Ucraína por parte de Rusia, e nese contexto aseverou que é "necesaria" unha Administración "forte" e "con políticas áxiles".
En troques, a portavoz do grupo popular, Rosa Gallego, xustificou o voto en contra do seu partido na ausencia da súa "primeira premisa", que é "baixar impostos". Gallego, ademais, cualificou os orzamentos como un "atropelo".
O BNG manifestou a súa intención de "non obstaculizar" a tramitación das contas, razón da súa abstención.
O portavoz municipal nacionalista na Coruña, Francisco Jorquera, criticou o "procedemento antidemocrático" co que o Executivo da cidade tramitou os orzamentos, "sen darlle tempo" á oposición a acceder á documentación coa "suficiente antelación" para formarse unha "opinión cabal" a respecto do contido.
Ademais, o portavoz nacionalista manifestou "dubidar" da "solvencia" do Goberno municipal para "materializar" un proxecto de orzamentos municipais que "debería ser críbel".
