O PSdeG anunciou este sábado, 14 de xaneiro, que porá unha queixa ante a Valedora do Pobo pola elección en Ourense dunha persoa condenada por abusos sexuais para representar ao rei Baltasar na Cabalgata de Reis.
Así o sinalou Silvia Fraga, a secretaria de igualdade do PSdeG, que tachou a situación de "gravísima" desde "unha vertente ética e legal" e apuntou que "a dimensión moral é indiscutíbel".
"Trátase dunha persoa que cometeu delitos graves contra varias mulleres e estaba a representar ao Concello nun acto dirixido a nenos e nenas", destacou a secretaria de Igualdade do PSdeG.
A socialista lamentou que "non se trata dun feito sorprendente", xa que "vai coas actitudes misóginas e machistas da persoa que está á fronte do Concello de Ourense", aludindo ao rexedor, Gonzalo Pérez Xácome, e tamén "en coherencia coa ausencia de políticas de igualdade na cidade".
En canto á legalidade, Fraga referiuse ao artigo 57 da Lei Orgánica 8/2021 do 4 de xuño de Protección Integral á Infancia e á Adolescencia fronte á violencia, asegurando que "estabelece a obrigatoriedade de pedir o certificado negativo de delitos sexuais para participar en actos nos que haxa nenos, nenas e adolescentes".
Esta mesma acusación foi lanzada a sexta feira no pleno ordinario do Concello, no que se pediu a dimisión de Jácome e no que o rexedor defendeuse sostendo que a lei estabelece esa obrigatoriedade "a condición de que o contacto con persoas menores de idade sexa habitual" e "conleve un trato repetitivo, regular e non ocasional".
En todo caso, Silvia Fraga expuxo que, se o alcalde pedise "o preceptivo documento, sabería os antecedentes", mais que "aínda en caso de descoñecelos por non pedilos", "o silencio" ao longo da semana desde que a oposición denunciou os feitos "foi intolerábel e atronador".
Neste mesmo sentido respondeu á defensa do alcalde sobre o "contacto ocasional" e non habitual, insistindo que a lei "indica que o certificado é preceptivo para calquera evento que teña como destinatarios principais a persoas menores de idade".
A responsábel de política social do PSdeG, Marga Martín, reiterou que a normativa de protección de menores estabelece que todas as actuacións das entidades públicas e privadas, en materia de infancia, "deben protexer ao menor por encima de calquera outro interese", polo que "todas as actividades que se realizan deben asegurar o coidado na protección e a seguridade da infancia".
Así pois, os socialistas criticaron que "centos de nenos e nenas achegáronse a un delincuente sexual", o que tachan de "feito sen paragón". "Denota o desprezo do alcalde á infancia e á cidadanía en xeral, ademais da falta de compromiso do primeiro edil coas políticas de igualdade de xénero", denunciaron.
Paralelamente, Martín lembrou que o alcalde "desvencelleu o sistema de protección contra a violencia de xénero e seguimento das vítimas de violencia machista". Así as cousas, a formación deu a coñecer que elevará unha queixa á Valedora do Pobo, en próximas datas, e que, de ser necesario, non descartan "recorrer a outras instancias".
