A socialista instou a Xunta a seguir o camiño marcado polos concellos, sinaladamente o do Barco de Valdeorras, e cumpra coas súas competencias para pedir a declaración de zona catastrófica na superficie arrasada polos incendios forestais. Esta fórmula, explicou, “permitiría axilizar as axudas e medios necesarios para os veciños”.
Sinalou que estes incendios puxeron sobre a mesa a “gran debilidade” do servizo de prevención e defensa contra os incendios, “focalizado polo Goberno galego na extinción no canto de adoptar medidas preventivas antes de que comecen os lumes”. Reivindicou un “servizo único, profesional e equipado dependente da Xunta”, que é quen conta cos recursos necesarios.
Explicou que os concellos carecen da capacidade orzamentaria da que si dispón o Goberno galego, que destina cada ano 142 millóns de euros á extinción e prevención de incendios. Engadiu a necesidade de “empregar unha cantidade moito máis importante na prevención que na extinción”, logo de que o informe do Consello de Contas de 2016 sinalara que “debera ser gastado o 87 por cento en prevención e o 13 por cento en extinción, xusto o contrario do que fai a Xunta”.
Ademais de reivindicar a “reformular a xestión forestal”, cargou contra un modelo de extinción “máis propio dos anos 90”. Engadiu que o principal problema dos lumes “radica no abandono absoluto no que se atopa o noso rural, convertido nun territorio improdutivo”.
Iniciativas
A socialista presentou unha batería de propostas “en positivo” para reclamarlle á Xunta que “poña en marcha de forma urxente un plan de recuperación da actividade agrogandeira e forestal fronte ao despoboamento do rural galego”.
Tamén comprende a “profesionalización da loita contra o lume” e “traballos de prevención durante todo o ano”, sinaladamente antes da temporada de alto risco, “incluíndo ademais medidas de concienciación cidadá”.
Urxiu tamén a realizar plans de autoprotección e evacuación dos núcleos de poboación, e actualizar o dispositivo, implantando unha óptima organización dos medios materiais e humanos.