O portavoz parlamentario do PSdeG, Luís Álvarez, considera que a sanidade galega está nunha situación de "voadura controlada" a raíz da "xestión caótica" da que responsabiliza o Goberno galego.
Álvarez reclamou ao conselleiro de Sanidade, Julio García Comesaña, que obrigue a quen ten por baixo e, en concreto, á xerente da área sanitaria de Santiago de Compostela-Barbanza, Eloína Núñez, a que asuma as súas responsabilidades ante o goteo de dimisións en xefes de servizos e protestas dos médicos.
O portavoz da formación socialista no Hemiciclo relatou algúns dos últimos acontecementos relativos á sanidade, como a sentenza do Tribunal Superior de Xustiza da Galiza (TSXG) contra o Sergas pola carga de traballo do persoal facultativo, que "vén confirmar o que levamos alertando desde hai anos", das "consecuencias do desmantelamento do servizo público".
Para o parlamentario socialista é "hora de que se tomen medidas eficientes" e que o conselleiro "demostra autoridade para tomar medidas". "Ou se non, en primeira persoa", avisou Luís Álvarez, quen engadiu que "o sistema sanitario público da Galiza non é do Partido Popular, é dos galegos e galegas".
"Curmá de Feixoo"
Así as cousas, e nunha aclaración a preguntas dos medios, o portavoz parlamentario socialista dixo que a xerente da área sanitaria de Santiago "debe presentar a súa dimisión pola súa incapacidade manifesta".
Neste sentido, Álvarez recoñeceu que hai "un problema político para o PP, con certas connotacións familiares", xa que a xerente da área sanitaria é a curmá do ex presidente da Xunta Alberto Núñez Feixoo.