Progresistas e nacionalistas manterán a Deputación de Pontevedra

A Deputación de Pontevedra está dirixida desde 2015 por un Executivo de coalición entre socialistas e nacionalistas. Naquela altura, a suma de PSdeG e BNG apartou do Goberno a dereita, que viña gobernando a corporación de maneira ininterrompida desde 1979. Precisamente, esta institución tiña unha significación especial para o Partido Popular, sendo a base desde onde Alberto Núñez Feixoo tomou o control da formación na Galiza en 2006. O Partido Socialista da Galiza conta con 13 escanos na corporación, nove dos cales foron conseguidos no partido xudicial de Vigo. Ao tempo, o Partido Popular dispón de 11 actas, obtidas en todos os distritos da circunscrición. Por último, o Bloque Nacionalista Galego suma tres representantes, dous eles procedentes do partido xudicial de Pontevedra e un do distrito de Tui. As sondaxes que manexan as tres formacións con presenza na Deputación non avanzan grandes alteracións nos sete partidos xudiciais nos que se divide a circunscrición electoral para os comicios do vindeiro 29 de maio. A este respecto, apostan por un reparto análogo ao de 2019 para os distritos da Estrada, Lalín, Ponteareas e Tui. Os partidos xudiciais da Estrada, Lalín e Ponteareas elixen un único escano, correspondéndolle nos tres casos ao Partido Popular. Ademais, o distrito de Tui escolle tres actas, recaendo a primeira no PP, a segunda no PSdeG e a terceira no BNG. A respecto deste último partido xudicial, as sondaxes apuntan a un avance de socialistas e nacionalistas que non chegaría para alterar a representación actual. O partido de Cambados O PSdeG aspira a conseguir un deputado máis no partido xudicial de Cambados, que lle permitiría alcanzar a maioría absoluta na Deputación no caso de manter a mesma representación no resto dos distritos. A favor desta opción, argumentan que nos comicios de 2019 ficaron a 1.054 sufraxios da segunda acta, que obterían en prexuízo do PP, e sinalan que as perspectivas son mellores na actual conxuntura. Asemade, os socialistas consideran que as divisións internas dentro do PP pasarán factura ás expectativas electorais desa formación. As liortas do PP Os populares enfrontan un importante conflito interno en Vilanova de Arousa, concello do distrito de Cambados que lle outorgou nas pasadas eleccións locais 3.304 papeletas e 15,5% dos votos totais do partido xudicial. Nesta ocasión, concorren á alcaldía de Vilanova dúas candidaturas do ámbito popular, unha liderada polo actual alcalde do PP, Gonzalo Durán, e outra polo seu irmán, Juan José Durán, antigo concelleiro popular e presidente de Portos da Galiza entre 2011 e 2019, que en maio concorre polas siglas de Renova Vilanova. O retorno ao Partido Popular de Independentes de Ribadumia é outra das variábeis a ter en conta neste partido xudicial. A formación independente, promovida polos seguidores do antigo alcalde José Ramón Barral, coñecido popularmente como 'Nené' Barral, expulsado do PP pola súa relación co contrabando, goberna neste concello de Salnés con 1.771 sufraxios e oito concelleiros. Fontes da dirección do PP pontevedrés consideran que esta integración reforza a súa posición neste partido xudicial ao pór fin a 20 anos de división nas filas da dereita na localidade. A batalla de Pontevedra Pontevedra é outro dos distritos da circunscrición onde se librará unha batalla. Neste caso, populares, socialistas e nacionalistas vense en disposición de mellorar os seus resultados de hai catro anos. Precisamente, en 2019 o PP obtivo 50.065 votos e tres representantes, o BNG 36.890 votos e dous representantes e o PSdeG 28.038 votos e dous representantes, aumentando un, en detrimento dos nacionalistas, en relación a 2015. A posibilidade dun cambio no reparto de escanos no distrito de Pontevedra resulta complicado. Neste sentido, o PP ficou en 2019 a 6.016 votos de conseguir o cuarto deputado, o BNG a 5.167 votos de conseguir o terceiro deputado e o PSdeG a 14.020 votos de conseguir outra acta máis. Aínda así, as fontes nacionalistas consultadas por Nós Diario dan por certo un incremento da representación neste partido xudicial, en base a un aumento na intención de voto na cidade e nos grandes concellos da comarca do Morrazo. A loita en Vigo Vigo é outro punto do partido xudicial chave na circunscrición electoral de Pontevedra. Precisamente, os resultados na cidade de Abel Caballero explican a maioría socialista na Deputación, até o punto de achegar este distrito nove de 13 deputados cos que conta o PSdeG. Os outros dous escanos en xogo caeron da banda do Partido Popular en 2019, ficando o BNG naquel proceso electoral a 1.088 sufraxios e a menos dun punto porcentual de obter unha acta neste distrito. As sondaxes outorgan aos nacionalistas un deputado por este partido xudicial nos comicios de maio. Neste caso, a acta conseguiríana á custa dos socialistas, que verían recortada a súa representación a oito representantes. O incremento de sufraxios do BNG viría de man dos resultados da cidade de Vigo, onde os nacionalistas agardan aumentar a súa intención de voto, igual que nalgúns dos grandes concellos da súa área metropolitana. A circunscrición de Pontevedra é o principal problema para o PP Reparto de escanos por partidos xudiciais na Deputación de Pontevedra (Foto: Nós Diario). A circunscrición de Pontevedra é o gran buraco negro electoral do Partido Popular na Galiza. A este respecto, o PP certifica neste territorio nos diferentes comicios os peores datos de todo o país. Nas últimas eleccións decorridas, as galegas de xullo de 2020, nacionalistas e socialistas superaron os populares na circunscrición en 24.488 votos e en máis de cinco puntos. Ademais, os conservadores obtiveron a porcentaxe de voto máis baixa da Galiza, con 42,37%, e 5,59 puntos por baixo da media do país. A perda de peso no ámbito local explica parte dos resultados dos populares. Neste sentido, o PP tense convertido nunha formación esencialmente rural e en claro retroceso, como acontece na área metropolitana de Vigo, pero tamén en comarcas como O Salnés, en tempos auténtico bastión interno e externo do partido. Tanto é así que a historia dos conservadores de Pontevedra, desde a decapitación de Mariano Raxoi por José Luis Barreiro en 1986, enténdese polo papel decisivo desta zona no partido. A Deputación de Pontevedra foi durante décadas o pau de palleiro do poder do PP na circunscrición. Ao tempo, xogou un papel chave nos procesos internos do partido, condicionando momentos tan importantes como a sucesión de Manuel Fraga e resultando decisiva para a elección de Alberto Núñez Feixoo como líder dos populares galegos fronte aos outros candidatos. Neste momento, o Goberno provincial resulta un obxectivo inalcanzábel para a formación conservadora.