O Partido Popular leva en crise en Viveiro desde hai 20 anos. Á perda da Alcaldía en 2003, seguíronlle innumerábeis conflitos internos que chegan até hoxe. Precisamente, a necesidade de recuperar a unidade dentro da partido centrou a totalidade dos discursos no tradicional xantar de outono dos populares do occidente da Mariña.
O xantar, que reuniu arredor de 100 persoas dos concellos de Viveiro, Xove, Cervo e Burela, contou coa presenza da secretaria xeral do PPdeG, Paula Prado, que trasladou aos presentes a importancia de ter “un partido forte e unido como o que hoxe vexo aquí”, porque “iso é o que demanda a xente do noso partido e o motivo polo que depositan en nós a súa confianza nas eleccións”.
Prado defendeu a candidatura do actual voceiro local da formación, Óscar Rodríguez, de quen significou” a combinación de xuventude e experiencia”. Precisamente, o liderado de Rodríguez é cuestionado por amplos sectores da formación, botándose en falla a presenza no acto de diversas referencias sociais da formación.
A secretaria xeral dos populares galegos apostou porque “o próximo 28 de maio nos ides dar unha alegría enorme facendo que Viveiro volva a ser azul” porque “o PP é a única alternativa seria ao desgoberno socialista”
A dirixente popular asegurou que “mentres a esquerda pretende monopolizar determinados sectores, nós somos un partido que representa a todo o mundo e por iso somos o partido que máis se parece a Galiza”.
'Estar máis unidos que nunca para facer posíbel un gran cambio'
O actual líder do PP na localidade, Oscar Rodríguez, reclamou ao seus “estar máis unidos que nunca para facer posíbel un gran cambio” e animou a afiliación a “traballar intensamente durante os próximos meses centrándonos única e exclusivamente en recuperar Viveiro”.
Rodríguez sinalou que “temos que frear a perda de servizos que está sufrindo Viveiro desde hai 20 anos” e reivindicou que “practicamente todo o que se fixo en Viveiro é resultado da herdanza recibida das dúas décadas de goberno do Partido Popular”.
O coordinador xeral dos populares lugueses e deputado no Parlamento da Galiza, José Manuel Balseiro defendeu a importancia de “ter un partido ben engraxado” porque “as eleccións só se gañan cando detrás do candidato hai un partido forte e unido”.
