luns 20.01.2020

O PP impide a declaración de Monte Pindo como zona catastrófica

Os votos populares no Parlamento impiden elaborar un plan urxente de restauración ambiental con dotación económica para ese área. Tamén rexeita o PP  iniciar os trámites para a declaración de Parque Natural do Monte Pindo.

Incendio no Monte Pindo
Incendio no Monte Pindo

O Monte Pindo ficou arrasado o pasado 11 de setembro. Un xigantesco incendio queimou máis de 2.000 hectáreas (monte, labradíos, hortas, paraxes de gran valor ambiental, proximidade de zonas habitadas...) deste emblemático punto de Carnota e Galiza. Mais para o PP, sendo iso lamentábel, non é motivo para declarar Monte Pindo 'zona catastrófica' e sentar as bases para a súa recuperación, tal e como solicitaba o BNG a través dunha proposición on de lei.

Ana Pontón, parlamentar nacionalista, acusou ao Partido Popular de emitir “un voto vergonzoso” e impedir que as persoas afectadas polo incendio poidan recibir axudas, e acusou ao PP de “darlle vostedes as costas aos veciños e veciñas de Carnota”.

A fronte nacionalista mantivo na súa intervención que a Xunta pode  activar fondos destinados a paliar os danos nos lugares onde se produciu o incendio e poñer en marcha  un plan de recuperación . “Mais o PP nega esa posibilidade votando en contra destas propostas así como da declaración de Parque Natural para o Monte Pindo” porque  “non están a favor das políticas de conservación” .

O pailanismo cúrase viaxando

Ana Pontón animou ao PP a “viaxar un pouco máis” para comprobar que existen espazos no mundo cun valor “moi inferior ao Monte Pindo” que son elementos de riqueza importantísimos pero o Partido popular, inquiriu , “ prefire que o Monte Pindo siga esquecido” e non dotar de medidas unha zona que padece con crueza as consecuencias da emigración, a falta de emprego e a destrución de emprego no mar.

comentarios