A vicesecretaria de Política Social do PP, Ana Pastor, censurou a postura do Goberno central ante o caso da familia da escola de Canet de Mar (Maresme, Barcelona) e reivindicou o modelo de "bilingüismo integrador" que practica o Executivo galego, dixo, e "do que deberían aprender outros".
Pastor participou este sábado nunhas xornadas organizadas polo PP de Lugo sobre educación que reuniu a distintos membros dos populares, como os conselleiros de Educación na Galiza, Román Rodríguez, e Castela e León, María do Rocío Lucas Navas, ou o secretario xeral do PP galego, Miguel Tellado.
"Bilingüismo cordial"
A expresidenta do Congreso enxalzou o "bilingüismo cordial" que "garante o dereito para utilizar as dúas linguas" -en alusión ao do PP galego-, en contraposición ao modelo que, segundo Pastor, impón a Generalitat no sistema educativo catalán.
Neste sentido, explicitou o compromiso do PP para "acudir onde faga falta" para denunciar o caso da familia de Canet "acosada e insultada" por reclamar que o seu fillo reciba clases en español.
"Queremos que o Goberno actúe xa ante esta situación intolerábel", incidiu Pastor, que reivindicou o modelo de "liberdade de elección dos pais" que "xa se fai" nas comunidades gobernadas polo PP.
Para Pastor, é necesario que as Administracións protexan "o dereito" das familias a escoller onde envían estudar aos seus fillos e fillas, polo que aposta por fortalecer tanto a rede pública como a educación concertada, xa que, desta maneira, garántese "unha oferta plural e complementaria".
"Defender e apostar pola escola pública non é afogar á concertada. Cremos nun sistema inclusivo e de calidade, pero esa educación inclusiva non pode impedir que os pais elixan a educación dos seus fillos", incidiu Pastor.
Cultura do esforzo
Pola súa banda, Miguel Tellado tamén puxo o acento en que o modelo educativo que defenden os populares galegos "fomenta a igualdade de oportunidades e defende a cultura do esforzo".
Deste xeito, censurou que partidos políticos queiran "igualar por abaixo" a través dun sistema que pretende facer "que todos os alumnos sexan iguais rebaixando os estándares de calidade".
Todo iso, segundo Tellado, "simplificando e reducindo temarios, atacando á escola concertada, evitando que se poida repetir curso e quitando ao profesor a súa capacidade avaliadora".
