O PP emenda as contas da Xunta para favorecer as rendas altas

O Parlamento galego, cos votos do PP, rexeitou as emendas á totalidade dos grupos da oposición -BNG e PSdeG- ao proxecto de Orzamentos da Xunta de 2022 e á Lei de medidas fiscais e administrativas que acompaña as contas -a chamada lei de acompañamento-. O debate orzamentario volverá a pleno o 21 de decembro coa presentación das emendas parciais e a votación definitiva. A oposición cargou este 22 de novembro con dureza contra a política fiscal da Xunta "que favorece quen máis gaña", ao tempo que reclamou progresividade nos impostos. "Paga a pena ler o proxecto?" preguntou ironicamente a viceportavoz do BNG, Olalla Rodil, en referencia ao feito de que o PP queira mudar o proxecto de Orzamentos a través de emendar a Lei de acompañamento que tamén é da Xunta, é dicir, do Goberno que o propio PP forma. A cuestión é que o grupo popular emendou a Lei de acompañamento para deixar sen efecto nos Orzamentos de 2022 a suba no IRPF de 22,5% a 23,5% da cotización no tramo autonómico para as rendas que superan os 100.000 euros. Desta maneira, de saír adiante a emenda popular, suprimirase a suba do IRPF para as rendas máis altas contemplada nas propias contas da Xunta. Coas emendas do PP quedarán fixados cinco tramos no IRPF: de 9,4% do primeiro a 22,5% con base liquidábel de 60.000 euros en adiante, desaparecendo así o novo tramo previsto no proxecto de orzamentos de 23,5% que se estabelecía para quen superase os 100.000 euros. Pontón denuncia a "farsa fiscal" de Feixoo "Canto máis alta é a renda, maior beneficio fiscal". Así resumiu a líder do BNG, Ana Pontón, a proposta da Xunta. "Quen perciba unha base liquidábel inferior a 20.200 euros, aforrará 20 ao ano; en cambio, se está entre 60.000 e 100.000, a rebaixa será de 495 euros anuais, 25 veces máis". A nacionalista lembrou que só 2,56% das e dos galegos superan os 60.000 euros líquidos anuais. “Nisto consiste a rebaixa fiscal do PP, que sería mellor chamar farsa fiscal ou inxustiza fiscal”, argumentou, tras reivindicar que “quen máis gaña, debe pagar máis”. Caballero acusa a Xunta de mazar a progresividade O voceiro do PSdeG no Parlamento, Gonzalo Caballero, lamentou que o PP "aproveite o aumento dos fondos comunitarios e a política expansiva do Goberno español para rebaixar os impostos das maiores rendas e patrimonios". Por iso, cualificou de "grave" a emenda dos populares que “impide que suba unha décima o tipo marxinal do IRPF de quen cobra máis de 100.000 euros ao ano”. Trátase dun "mazo á progresividade”, dixo, criticando que a rebaixa fiscal se dará nas rendas altas mentres nas medias e pequenas rondará apenas os 12 euros anuais. O socialista criticou que a Xunta aposte en que a baixada de impostos sexa a vía para aumentar o crecemento económico, algo que “ninguén defende xa en ningún modelo económico do mundo”. Acusou o Goberno galego de ter "un discurso trampón de baixar os impostos a todos para financiar a sanidade, a educación e a política social”, unha “trampa propagandística”. Recortes en sanidade Precisamente, os orzamentos inclúen un recorte de oito millóns na Atención Primaria, pasando dos 1.391 millóns de 2021 aos 1.389 millóns para 2022. Os recursos fican aínda máis lonxe do orzado 12 anos atrás, en 2009, nas contas do último Goberno galego de coalición (PSdeG e BNG) antes da chegada de Feixoo á Xunta. Daquela foron 1.436 millóns para a Primaria, que coa suba do IPC desde outubro 2009 serían hoxe 1.619 millóns. Pola contra, denunciou o PSdeG, destínanse para 2022 máis de 700.000 euros para 52 capeláns en hospitais, mentres o Sergas “despide un importante número de profesionais sanitarios que precisa o sistema”. Educación é outra das áreas nas que o PP "rega o sector privado con 264 millóns de euros", denunciou a oposición; ao tempo que baixan os recursos para conciliación e inclusión, nunha Galiza con 694.367 persoas en risco de pobreza ou exclusión social. De facto, o orzamento consolidado para 2022 da Consellaría de Emprego e Igualdade consigna no programa de Apoio á conciliación da vida laboral e persoal e outros servizos de protección social 1.998.000 euros, 25% menos que en 2021. Aumento do gasto en persoal de confianza A oposición coincidiu en criticar "uns orzamentos sen política de vivenda, cega ás necesitades de desenvolver o estado de benestar e de impulsar o gasto social", mais que pola contra incrementa 6% o gasto en asesores e persoal de confianza da Xunta. Máis de mil emendas No pleno de 21 de decembro haberá máis de 1.000 emendas parciais ás contas. O BNG presentou 430 para mobilizar 1.486 millóns co fin de ampliar os recursos en sanidade, política social -incluíndo un novo modelo de residencias de maiores-, educación, crise industrial, innovación e memoria histórica. O PSdeG, pola súa banda, solicita mobilizar 466 millóns coas súas 490 emendas, incrementando as partidas destinadas a potenciar e fortalecer a sanidade, educación, os concellos políticas sociais e vivenda. A Xunta estima a recuperación económica en 2022 O conselleiro de Facenda do Executivo galego, Miguel Corgos, asegurou durante a defensa do proxecto de orzamentos que a Galiza estará en disposición de recuperar a riqueza prepandemia no primeiro semestre de 2022, cun crecemento do Produto Interior Bruto sostido de 6%. "Co ritmo de crecemento que levamos este ano e de acordo ás previsións do Instituto Galego de Estatítisca (IGE) para o seguinte, podo confirmar que a Galiza está en disposición de recuperar a riqueza prepandemia no primeiro semestre de 2022 e superala ao longo do próximo exercicio", sinalou. "Así o estimamos porque vemos un crecemento do PIB sostido de 6% tanto este ano como o próximo", explicou o conselleiro de Facenda, que detallou que este crecemento estará sostido tanto no incremento do consumo privado como nun "especial esforzo" en investimento produtivo por parte da Administración galega, que terá reflexo no crecemento de "8,1% en formación bruta de capital", no que se terá en conta tamén a execución dos fondos europeos Next Generation. A Xunta declina xogar en primeira división O descontento coa repartición dos fondos de recuperación realizada polo Estado ás comunidades autónomas -e co ollo posto nos fondos europeos que virán- aviva o debate sobre o financiamento autonómico. Así, a práctica totalidade de partidos e Goberno autonómicos están a demandar unha reformulación do modelo de financiamento territorial. E de cara a este debate, o presidente da Xunta, Alberto Núñez Feixoo, xa escolleu en quen apoiarse. Non será nin nas institucións que gozan de modelos de financiamento propios e avanzados, como o concerto vasco ou o convenio navarro, nin en Catalunya, que conta con longa experiencia negociadora. Estes tres territorios non se contemplan na cimeira que este 23 de novembro decorre en Santiago e na que Feixoo é anfitrión. Si están convidados o presidente de Castela e León, Alfonso Fernández Mañueco (PP); e os presidentes socialistas Concha Andreu (A Rioxa), Emiliano García-Page (Castela-A Mancha), Guillermo Fernández Vara (Extremadura), Javier Lambán (Aragón) e Adrián Barbón (Asturies); e o mandatario cántabro, o rexionalista Miguel Ángel Revilla. Na véspera da cimeira, o conselleiro de Facenda, Miguel Corgos, sostivo no Parlamento que o debate do financiamento autonómico leva pendente de "revisión desde hai sete anos" e recoñeceu que non achega recursos suficientes. A intención da Xunta con esta convocatoria, indicou, é "tender pontes para conseguir espazos de colaboración" Respecto diso, a líder do BNG, Ana Pontón, criticou que Feixoo estivese "calado" até o de agora ante un modelo que "discrimina" a Galiza. Censurou que, aínda que o sistema leve "sete anos caducado", os grupos da oposición non coñecen "a posición de Feixoo". "Vai ir a unha reunión na que este Parlamento non sabe que vai defender, porque non nos chegou nin un só documento", dixo Pontón. Ademais, replicou ao conselleiro que o obxectivo "non debe ser tender pontes" senón que "a Galiza reciba un trato xusto" e teña un sistema que lle dea "a chave dos seus recursos". O "ataque que fan á bilateralidade agocha a súa falta de confianza no país", apuntou. Pola súa banda, o portavoz do PSdeG, Gonzalo Caballero, tendeu aos grupos a man dos socialistas galegos para traballar nun novo modelo de financiamento que teñan en conta as necesidades específicas do avellentamento da poboación e a dispersión. "A Galiza non necesita un modelo de cota nin de concerto económico. Tampouco un conflito como defende a Xunta, senón ser parte da solución", reivindicou, avogando por modelo de financiamento que favoreza as e aos galegos.