Rajoy non irá ao Congreso porque non ten nada que explicar e porque en realidade non se ten producido ningún debate aberto no seo do PP a este respeito, argumentan desde a formación conservadora para negar a comparecencia do seu líder. En realidade, si que hai un debate aberto e aínda non inteiramente resolvido. E non só no partido, tamén na dereita mediática se está a producir unha seria discusión a este respeito, con algúns artigos críticos coa reforma.
Segundo fontes do PP, a nova lei eleitoral consistiría en que nas eleccións municipais o partido máis votado obtería a maioría absoluta de forma automática sempre e cando obtivese no mínimo un 40 por cento do voto e conseguise unha vantaxe de máis de 5 pontos sobre o segundo partido.
É obvio que o PP promove esta reforma porque coa actual lei o previsíbel é que perdería a parte do león do seu poder municipal, e nomeadamente cidades chave para o partido como Madrid ou Valencia. Na Galiza o PP ten en risco as cidades que goberna (Ferrol, A Coruña, Santiago).
Mal momento do PSOE
Os estrategas do PP contan, alén do máis, coa fragmentación do voto no campo da esquerda política española, agudizada pola irrupción de Podemos. O mal momento eleitoral do PSOE -nos territorios de predominancia conservadora en moi poucos concellos o partido que agora lidera Pedro Sánchez tería opcións de estar a menos de 5 pontos do PP- completaría a xogada.
O PP mantén a linguaxe da negociación. Aliás, seu portavoz dixo que a formación conservadora está aberta a discutir os termos da reforma, cando a leve ao Congreso, “quizá” en setembro.
A oposición critica a reforma en bloco, por considerar que o PP prepara unha lei feita á medida dos seus intereses partidistas.