“É evidente que o PP non vai estar cómodo nesta comisión de investigación”. Afirmábao nunha conversa con Sermos Galiza Eva Solla, vicepresidenta do Parlameno e portavoz de Sanidade de En Marea., ao cabo da comisión impulsada pola oposición para investigar as consecuencias dos recortes sanitarios do Partido Popular. Por iso o PP é consciente da importancia de tentar controlar a comisión, o quer ten doado grazas á súa mayoría absoluta.
O PPdeG controlará a comisión. Así, a deputada popular Marta Rodríguez Arias presidirá este organismo, mentres que ocupará a vicepresidencia o tamén popular Jesús Miguel Prado Patiño. Mentres, a deputada de En Marea Eva Solla, por parte da oposición, ocupará o posto da secretaría.
Nesta comisión, os populares achegan sete dos 12 membros. Por parte de En Marea figuran o portavoz parlamentario, Luís Villares, e a portavoz en Sanidade, Eva Solla (secretaria); mentres que o PSdeG achega Julio Torrado (responsábel deste tema), e o seu portavoz parlamentar, Xoaquín Fernández Leiceaga. O BNG sitúa nesta comisión Ana Pontón.
O título da comisión indica que pretende determinar as "consecuencias dos recortes e privatizacións sobre o sistema sanitario galego (2009-2018), con especial incidencia en casos como a non dispensación de medicamentos necesarios a enfermos de Hepatite C ou o falecemento dun paciente sen atención na PAC da Estrada".
