O PP de Baltar parte como favorito para reter a Deputación de Ourense

O Partido Popular mantívose como a forza con máis escanos na Deputación de Ourense nos comicios de 2019, e ficou a unha acta da maioría absoluta. Naquela altura, un acordo entre Democracia Ourensá, de Gonzalo Pérez Xácome, e Xosé Manuel Baltar deixou este no Goberno da corporación provincial e entregou ao primeiro a alcaldía da cidade das Burgas. Porén, a maioría dos populares viuse reforzada a medida que avanzaba o mandato co retorno ás súas filas da deputada de Ciudadanos, Montse Lama, integrante do Executivo de Baltar entre 2015 e 2019. Xosé Manuel Baltar: "Todo acordo entre partidos é lexítimo, tamén os de Sánchez" Os resultados dos populares en 2019 explícanse no marco dunha forte caída do voto no partido xudicial de Ourense. Nesta dirección, o PP viu reducida a súa representación en dous escanos, tras pasar de 42,04% dos sufraxios en 2015 a 35,1% en 2019, alcanzando o PSdeG unha acta máis e obtendo Ciudadanos unha nova acta, con 5,85% dos votos. Precisamente, esta formación estaba liderada por antigos concelleiros do PP, como a propia Montse Lama ou Jose Araúxo, candidato da formación laranxa á alcaldía da cidade e persoa de referencia no Executivo municipal de Jesús Vázquez Abade (PP). As proxeccións e sondaxes que manexan as formacións non adiantan grandes mudanzas na representación dos sete partidos xudiciais nos que se divide a circunscrición electoral para os comicios do vindeiro 29 de maio. A este respecto, PP, PSOE e BNG asumen un reparto análogo ao de 2019 nos distritos da Pobra de Trives e Bande, onde os populares veñen posuíndo tradicionalmente o único representante en xogo con folgadas maiorías. Deben os deputados provinciais ser elixidos por sufraxio directo? A tendencia é semellante nos partidos xudiciais do Barco de Valdeorras, O Carballiño, Ribadavia e Verín. Neste caso, populares e socialistas dividíronse en 2019 a partes iguais os oito escanos en xogo, logrando cada formación, en conxunto, catro actas cada unha. Malia que non se albisca ningún cambio na representación nestes distritos electorais, agárdanse movementos no Carballiño e en Verín. Neste último lugar, o PP rexistra unha tendencia agudizada nos últimos tempos polos conflitos sanitarios na comarca. O partido de Ourense A batalla pola Deputación librarase no partido xudicial de Ourense, onde se elixen 15 de 25 actas en xogo. Neste caso, o resultado electoral da cidade, co 53,40% do censo, ou de localidades como Allariz, Barbadás, Celanova, O Pereiro de Aguiar, San Cibrao das Viñas e Xinzo de Limia, que suman en conxunto outro 22,6% do corpo electoral, é chave para o reparto final dos escanos. Arquívase a causa aberta contra Baltar por prevaricación O PP ficou en 2019 a 136 de votos de conseguir o sétimo deputado no partido xudicial de Ourense. Naqueles comicios, os populares alcanzaron 39.592 sufraxios e seis representantes, os socialistas 28.964 sufraxios e cinco representantes, Democracia Ourensá 13.226 sufraxios e dous representes, os nacionalistas 9.958 sufraxios e un representante e Ciudadanos 6.595 sufraxios e un representante. As marxes electorais A escasa diferenza de sufraxios de hai catro anos aumenta as posibilidades dalgún cambio na asignación de escanos no distrito de Ourense. A este respecto, os politólogos consultados por Nós Diario sinalan que o PP, recuperando unha porcentaxe dos votos de Ciudadanos, estaría en condicións de recuperar a maioría absoluta. Así, destacan que unha parte dos cadros da formación laranxa xa retornaron ás filas populares e non se descarta na candidatura deste partido en Ourense a presenza de José Araúxo. PP, PSdeG, Democracia Ourensá e BNG vense en condicións de aumentar a súa porcentaxe de votos na cidade de Ourense. Os populares, encabezados polo antigo alcalde, Manuel Cabezas, apostan por volver ser a forza máis votada, confiados no tirón do seu candidato e na volta ao partido dunha parte do electorado que en 2019 fuxiu ás filas de Ciudadanos e de Democracia Ourensá. Silencio na Xunta coas contas da Deputación de Ourense Os socialistas dan por seguro manterse como primeira forza na cidade das Burgas e agardan sumar para conseguir a alcaldía. Neste sentido, explican que as enquisas elaboradas após confirmarse a candidatura do antigo rexedor Francisco Rodríguez confirman un incremento na porcentaxe de votos da formación, que aspira a facerse con parte do electorado das candidaturas de Ourense en Común, Podemos e Esquerda Unida e Ourense Mellor. O "voto oculto" de Xácome As sondaxes danlle unha baixada a Democracia Ourensá, mais as fontes consultadas por Nós Diario non acreditan nesa tendencia. Malia que as últimas enquisas sitúan a lista do actual rexedor, Gonzalo Pérez Xácome, con ao redor de cinco actas, as mesmas firmas de inquéritos apuntan que esta formación conta con moito voto oculto. Sexa como for, a súa presenza na Deputación está garantida e falta por saber se voltará a ser decisiva. Desde as filas do BNG, pola súa parte, amósanse convencidas e convencidos dun incremento da representación en Ourense e no seu partido xudicial. Nesta liña, consideran que unha parte moi importante dos máis de 4.600 sufraxios de Ourense en Común, Podemos e Esquerda Unida e Ourense Mellor van caer nesta ocasión do lado da formación nacionalista. Tamén dan por feito sumar un representante máis na Deputación. Unha vitoria de Baltar reforzaría o seu poder interno dentro do PP Reparto de escanos por partidos xudiciais na Deputación de Ourense (Foto: Nós Diario). As eleccións municipais de maio serán a primeira proba real para o liderado de Alfonso Rueda. O actual presidente galego, após herdar o seu cargo de Alberto Núñez Feixoo, ten por diante uns comicios que a esta altura non semellan os máis propicios para un Partido Popular cuxo poder local ficou reducido en 2019 a concellos de menor tamaño e á Deputación de Ourense. Neste sentido, calquera resultado que non pase por unha mellora cuantitativa e cualitativa dos resultados, sobre todo nos ámbitos urbanos e nas deputacións, debilitan o seu papel de cara a futuros citas electorais e de cara ao seu poder interno. A única deputación onde outorgan, neste momento, as sondaxes posibilidades certas de gobernar ao Partido Popular é a de Ourense. Malestar de alcaldes do PP con Baltar Porén, unha vitoria electoral dos populares nesta circunscrición, reforzaría o peso interno dun dirixente e dun modelo de partido, diferente ao representado por Rueda. Malia que o apoio de José Manuel Baltar e os populares ourensáns foi chave no proceso de relevo na Xunta e na elección do novo mandatario da formación, o PP de Ourense segue a ser cousa diferente e o seu máximo responsábel conta cun peso territorial do que carecen o resto dos responsábeis provinciais do partido. Un escenario como o actual nos comicios de maio deixa ao PP cun liderado asentado, o de Baltar, e outros tres, o de Rueda, Candia e Calvo, en precario. Porén, aínda fica moito partido por diante, máis aínda nuns tempos onde os resultados electorais resólvense nas últimas semanas de campaña.