xoves 16/09/21

O popular Eduardo Parga, novo alcalde de Malpica ao prosperar a moción de censura

O rexedor saínte, o socialista Walter Pardo, acusa os populares de acceder ao mando cunha "moción da vergoña" xestada en "sumidoiros".
Debate da moción de censura en Malpica.
Debate da moción de censura en Malpica. (Foto: Nós Diario)

O popular Eduardo Parga recuperou esta sexta feira a Alcaldía de Malpica de Bergantiños ao prosperar unha moción de censura contra o socialista Walter Pardo que foi apoiada polo concelleiro non adscrito, Alfredo Cañizo, ex representante de Ciudadanos na corporación.

A moción de censura, debatida nun ambiente moi tenso de máis de dúas horas de duración, quedou aprobada con sete votos a favor -seis do PP  e un do edil non adscrito- e seis en contra -catro do PSOE e dous do BNG-.

Tras as eleccións do 2019, o único concelleiro de Ciudadanos no Concello apoiou a investidura do socialista Walter Pardo e formou parte dun tripartito xunto a PSOE e BNG. Cañizo foi expulsado da formación laranxa ás poucas semanas daquela votación de investidura, pero formou parte do Goberno municipal até mediados de agosto de 2021. Nas últimas semanas, arrincou negociacións co PP para devolver o bastón de mando a mans de Eduardo Parga, rexedor entre 2011 e 2019.

O pleno extraordinario celebrouse no Centro Cívico de Malpica por cuestións de capacidade e non estivo exento de rifa debido aos berros das persoas presentes entre o público e aos reproches persoais lanzados entre membros de diferentes grupos políticos.

"Xamais me perderás Malpica"

O alcalde saínte, Walter Pardo, interveu cunha carta dedicada ao seu pobo na que manifestou, coa voz entrecortada, o "tremendo orgullo" de dirixir o municipio durante máis de dous anos. "Xamais me perderás, Malpica", garantiu o socialista.

Neste sentido, expresou a "dor" que sente polas "mans de quen deixa o Concello", xa que considera que o PP non presentou unha moción de censura, senón unha "moción da vergoña".

Así, explicou que o documento rexistrado polo PP consta de nove folios "baleiros" e de "literatura barata" para os malpicáns, porque están cheos de "faltas de respecto" e "insultos". "Non nomeastes a ningún sector social e económico para xustificar a moción de censura", esgrimiu, con críticas tamén para o feito de que o documento estivese unicamente escrito en castelán.

O novo alcalde

A respecto diso, o novo alcalde, Eduardo Parga, defendeu que a moción de censura é algo que "está dentro da mesma lei" e un instrumento que hai que "aceptar", tendo en conta que o ex rexedor xa se atopaba en minoría.

"O que está claro é que, se para vostede valía hai dous anos o señor Cañizo -o edil non adscrito- e que nos despachos sacásese unha maioría e nós aceptámolo e non fixemos ningunha parafernalia, vostede agora, con esta ferramenta que é a moción de censura, debería tamén ter a dignidade de aceptala e irse para casa", reclamoulle a Pardo.

Interrompido en numerosas ocasións por berros de persoas do público, o popular insistiu nunha idea: "Creo sincera e profundamente que esta moción de censura para Malpica era necesaria".

O texto da moción, só en castelán

Pola súa banda, o concelleiro non adscrito, Alfredo Cañizo, defendeu a súa traxectoria de "26 anos en política" en Malpica e lamentou os insultos recibidos por parte de persoas do público: "Eu simplemente estou a exercer o meu dereito democrático. Non estou a cometer ningún delito".

O portavoz do BNG, Daniel García, tamén censurou que o texto da moción estivese redactado unicamente en castelán e preguntou se foi Alberto Núñez Feixoo ou Pablo Casado quen a escribiu. Non en balde, aproveitou para defender que o goberno local, no que os nacionalistas tamén participaban até esta sexta, dedicouse a "atender á sociedade" do municipio durante a pandemia: "Unhas veces acertamos, outras veces erramos".

comentarios