De la Serna estivo esta terza feira en Ourense, mais non apareceu polos tramos abandonados do AVE en Ourense. Quen si o fixo e precisamente para denunciar a ausencia do ministro nese enclave foi a líder do BNG.
“Hoxe tiña que estar neste lugar o ministro de Fomento, Iñigo de la Serna, porque non hai obras do AVE neste tramo e son necesarias para modernizar o ferrocarril en Galiza”, enfatizou Ana Pontón, quen estivo acompañada na visita pola tamén parlamentar no Pazo do Hórreo Noa Presas, ben como polos alcaldes de Allariz e Baños de Molgas -Francisco García e Xaime Iglesias, respectivamente- e responsábeis do BNG ourensá.
Pontón ligou a parálise das obras do AVE co descenso dos orzamentos para Galiza, o que ten baptizado estes días como Recortazo, tesourada que é especialmente significativa na provincia de Ourense. Segundo a nota de imprensa servida polo Bloque, neste territorio galego o descenso das contas estatais é de 36 por cento, 274 millóns de euros menos (a parte do león da redución precisamente polo AVE).
A líder soberanista puxo a énfase en denunciar que unha cousa é que nos orzamentos aparezan determinadas partidas -previsión de créditos a asinar pola administración do Estado para financiar a realización de obras- e outra ben distinta é que eses fondos finalmente se invistan e os proxectos se executen.
Nun plano máis xeral, a portavoz nacional do Bloque criticou que, mentres o Goberno Rajoy retalla os investimentos na Galiza en 30 por cento, aumente, en troca, o orzamento de Defensa en 7 mil millóns de euros.
Acordo das forzas políticas e plano de investimento para Ourense
Avanzou tamén Pontón que no próximo pleno do Parlamento galego demandará a Feijóo que se sume a un pacto das forzas políticas galegas contra o Recortazo -o PP valenciano acaba de facer o propio na súa comunidade autónoma-, ao tempo que anunciou que o BNG proporá un plano de investimentos para Ourense "para atender á situación acelerada de despoboamento e precariedade no emprego. Con investimento público pode xerarse emprego de calidade no sector agrogandeiro, turístico ou termal así como riqueza cultural”.