En vésperas da folga xeral convocada na Mariña para 17 de novembro co obxectivo de reclamar futuro na comarca ante a crise industrial e o fechamento continuado de empresas, a portavoz nacional do BNG, Ana Pontón, mantivo esta segunda feira un encontro en Burela con responsábeis económicos e sociais. A Mariña "perdeu nos últimos anos máis de mil empregos no sector industrial e leva meses en vilo pola situación de Alcoa”, dixo a nacionalista.
Ademais de responsabilizar PP e PSOE da crise industrial da comarca, demandoulles actuacións para evitar que empresas como a factoría de Alcoa en Cervo ou a de Vestas en Viveiro tamén fechen.
Así, insistiu na intervención pública de Alcoa e demandou á Xunta e ao Goberno do Estado que "dean un paso adiante" nesa liña e instou PSOE e PP a apoiar a emenda presentada polo BNG aos orzamentos do Estado de 2022 en que precisamente se pide a intervención da factoría.
De facto, o deputado do BNG no Congreso, Néstor Rego, incidiu en que non garante polo momento o seu apoio aos orzamentos do Estado por non conter "concrecións" con respecto ás súas emendas e porque non aprecia "grande interese negociador" por parte do Goberno de PSOE e Unidas Podemos, polo que instou a conversar. "Gustaríanos votar a favor dos orzamentos porque significaría que son bos para a Galiza. Pero se isto non é así, evidentemente non vai ser esa a posición do BNG", dixo.
Empresas estratéxicas
“Alcoa é a única fábrica de produción de aluminio primario de todo o Estado, se fecha, o que agora producimos na Mariña producirase fóra e teremos que importalo", explicou Pontón.
"Temos que producir e defender a nosa industria porque non se pode seguir con esta dependencia do mercado asiático", engadiu.
Pontón sinalou tamén o paradoxo de que Vestas, factoría que produce elementos para parques eólicos, vaia fechar en pleno boom eólico. Propuxo que se vincule a instalación de novos parques a proxectos industriais no territorio para traducir a explotación do vento en creación de emprego.
Entre as demandas do BNG para a comarca está a creación dun plan de reactivación económica coa implicación de todas as administracións; avanzar nas infraestruturas pendentes a nivel viario, ferroviario e portuario e o impulso de sectores produtivos como o agrogandeiro.
