sábado 19/06/21

Pontón insta Feixoo a deixar de exercer de "axente comercial" do 'lobby' enerxético na Galiza

Insta o presidente galego a se posicionar do lado "das familias" e non das grandes empresas eléctricas. 
A portavoz do BNG, Ana Pontón, anuncia unha ofensiva contra as peaxes nos viarios que planea o Goberno estatal (Foto: Nós Diario)
A portavoz do BNG, Ana Pontón (Foto: Nós Diario)

A portavoz nacional do BNG, Ana Pontón, afeou ao presidente autonómico, Núñez Feixoo, que exerza como "axente comercial" das compañías enerxéticas na Galiza, unha actitude que ten como último exemplo o "modelo depredador" para o sector eólico amparado desde a Administración galega.

Nunha rolda de prensa esta segunda feira no Parlamento galego, a líder nacionalista fixo fincapé en que a "gran" mobilización do pasado sábado en Santiago, "a maior nos tempos do Covid", deixou "claro" que os galegos "non aceptan ese modelo depredador" e queren que desde a Xunta se impulse un marco para o desenvolvemento da enerxía eólica asentado "no respecto polo medio ambiente, pola xente que vive no rural e que deixe beneficios" no territorio.

Para Pontón, Feixoo "debe aclarar de que lado está", se no das familias ou no das grandes eléctricas, un "lobby" do que o presidente galego "exerce como comercial", segundo incidiu a portavoz do Bloque, que acusa a Xunta de xogar "a favor das multinacionais".

A continuación, Pontón indicou que, coa súa chegada a San Caetano en 2009, Núñez Feixoo fixo "toda unha declaración de intencións" cando eliminou da lexislación a posibilidade da participación pública nos novos parques eólicos e a obrigación a desenvolver proxectos vinculados ás explotacións.

Todo iso, continuou, empregando "para lavar a cara" o coñecido como "canon eólico" que, para Pontón, representa "as migallas" dos beneficios que obteñen en Galiza unhas compañías enerxéticas con "patente de corso" para "espoliar" os recursos da Galiza.

Como exemplo disto sinalou o parque de Ourol, promovido por Greenalia, empresa que representa "as portas giratorias" das que, di, se aproveita o PP en Galiza (en alusión á 'fichaxe' da ex conselleira Beatriz Mato pola compañía).

Neste sentido, Pontón asegurou que Greenalia achega "o 0,5%" en concepto do cánon eólico do total de beneficios que extrae da explotación do parque eólico de Ourol, unha mostra do "modelo de espoliación" favorecido, segundo a nacionalista, pola Xunta, que "pon a riqueza de Galiza a servizo dos beneficios das eléctricas".

Pontón tamén se detivo na "mentira" que, di, supón o argumento da creación de emprego vinculada ao desenvolvemento de parques eólicos. Sobre isto, lembrou que, paralelamente ao "boom eólico" nos montes galegos, tivo lugar o peche da única factoría de pas de aeroxerador que había en Galiza, a da multinacional Siemens Gamesa nas Somozas.

"É falso que os parques fixar poboación e cren postos de traballo", engadiu Pontón, que apuntou ao Concello de Muras como outro exemplo desta situación, pois é o municipio con máis aeroxeradores (371) mentres "só hai dous postos de traballo directos" en todo o concello vinculados á eólica.

comentarios