luns 20.01.2020
Sesión de control

Pontón a Feixoo: “Deixe de actuar como conselleiro delegado de Ence”

A vaga de incendios que está a ter lugar no inicio desta primavera é creada “pola súa política forestal ao servizo de Ence”. Así comezaba Ana Pontón, portavoz do BNG no Parlamento, a intervención na sesión de control ao goberno que tivo lugar na mañá da cuarta feira. Feixoo, pola súa banda, afanouse en defender os postos de traballo en Ence.

Ana Pontón, durante a sesión de control
Ana Pontón, durante a sesión de control

Ence centraba a pregunta do BNG ao presidente da Xunta na sesión de control ao goberno que tivo lugar na mañá da cuarta feira. Pontón, portavoz da forza nacionalista, comezaba a intervención amosando a solidariedade do Bloque coas veciñas que sufriron o grande incendio de Dodro e Rianxo e recoñecendo o labor do servizo de extinción.

Sinalou que a vaga incendios “é aviso do grave problema que crea a súa política forestal ao servizo de Ence”. Unha política forestal “pirómana”, afirmou, que “converte Galiza nunha polvoreira” e que pon en risco vidas humanas. Salientou que vai camiño de ser “o maior problema ambiental do país”.

Nese contexto, emprazou Alberto Núñez Feixoo a “estar ao servizo de Galiza e non ao servizo de Ence”, unha empreso, lembrou, “que privatizou ao Goberno de Aznar a prezo de saldo e que é paradigma das portas xiratorias do PP”. Cualificou ademais de “inmoral” que as persoas accionistas “sigan a gañar cartos a costa da ría de Pontevedra”.

Leu Pontón as palabras proferidas por Feixoo en 2009, cando aseguraba que “non cabe a posibilidade de manter a Ence na ría, non imos dicir unha cousa e facer a contraria”. “Xa vemos canto vale a súa palabra, absolutamente nada”. “Non só non cumpriu a súa palabra, senón que o vimos saltando como unha hidra cando coñecer a decisión da Avogacía do Estado sobre a prórroga de Ence”, engadiu. Tamén lle afeou que o Goberno de Raxoi non solicitase un informe á Avogacía do Estado cando decidiu, en funcións, prorrogar a concesión.

Pontón: “Cambiar as leis para favorecer Ence ten un nome: corrupción”

A este respecto, a portavoz do BNG subliñou que “cambiar as leis para favorecer Ence ten un nome: corrupción”. Reforzou o seu argumento co feito de que “a ningunha empresa lle regalan 600.000 metros cadrados de dominio público, nin se lle perdoan 6 millóns de canon de saneamento, nin se lle permite inzar o noso monte de madeira prima barata e inflamábel”. Foi entón cando lle espetou, “deixe de actuar como conselleiro delegado e lidere o proceso de traslado da pasteira, que é onde vostede ten competencias”.

“O único autogoberno que lle interesa é o dos accionistas de Ence, que gañen cartos poñendo en risco o futuro e o emprego de Galiza”, afirmou Pontón, que chegou a apuntar, “nin o presidente de Ence é capaz de defender os seus intereses como os defenden vostedes”. Por último, puxo de manifesto que “non hai cidade europea que non trasladase a súa industria contaminante”. Ilustrouno cos casos de Barcelona, Londres, Málaga e Bilbo. “Ten tan pouca ambición que cre que o único futuro é ter a ría de Pontevedra contaminada e os montes inzados de eucaliptos”, concluíu Pontón.

Feixoo: "Poñen en perigo milleiros de empregos e o tecido industrial de Galiza"

Sin títuloNa súa resposta, Feixoo agradeceu o labor do servizo de extinción de incendios, que traballaron, asegurou, en 39 lumes, con seis medios aéreos e 600 motobombas. Despois de agradecer ao Goberno de España a mobilización de recurso e a axuda á veciñanza, o presidente da Xunta acusou o BNG de “poñer en perigo milleiros de empregos e o tecido industrial de Galiza”.

A continuación, aludiu ao “grave menosprezo ao autogoberno” e á “falta de respecto” do Goberno central en relación á decisión adoptada pola Avogacía, “soubémolo polos medios”. A respecto do emprazamento de Ence, sinalou que ao PP tampouco lle gusta, “a cuestión é se fechamos ou non”, dixo, tratando de conducir o debate ao feche.

Para eludir o traslado da pasteira do debate, aduciu que Ence consome de auga “o duplo do que consome Pontevedra, Marín, Poio e Sanxenxo, 20 millóns de metros cúbicos”; está próxima a un porto e require dunha potencia eléctrica suficiente, pois “consome máis do duplo do que consome toda a comarca de Pontevedra”.

Na mesma liña, Feixoo asegurou que seguirá a traballar “polos intereses dos traballadores do país, dos propietarios da madeira e por cumprir a lei”.

comentarios