As eleccións municipais do 26 de maio deron unha remontada ao BNG en número de apoios en toda a Galiza que se traduciron en 456 concelleiras e concelleiros para a formación nacionalista. Co obxectivo agora de avanzar no debuxo das liñas comúns que guíen a acción política, o BNG celebrou este domingo 7 de xullo un cumio municipal que xuntou máis de 200 representantes locais da organización.
A portavoz nacional do BNG, Ana Pontón, tomou a palabra para pór en valor a os concellos como peza chave na construción da Galiza, mais subliñou que o BNG "non é unha suma de organizacións locais", senón que é unha "organización nacional e cun un proxecto de país". Pontón animou as e os edís a fuxir dos localismos porque estes "só buscan dividirnos. Só buscan que non vexamos a Galiza como un conxunto, como unha nación”, afirmou.
Engadiu ademais a líder nacionalista sobre o localismo que este sempre se “usou polas forzas estatais para desdebullar a nosa identidade como galegas e xogar a unha división interna que nos fai un enorme dano como país".
En canto aos resultados do 26M, a portavoz nacional subliñou que o BNG foi ratificado como “un referente a nivel de política municipal" dotado dun "proxecto transformador" para as vilas e cidades.
Após a constitucións dos consistorios municipais, sobre aqueles onde o Bloque non participa do goberno, indicou Ana Pontón a importancia de tamén facer política desde a oposición. "A paciencia é unha virtude revolucionaria, non podemos perdela. O traballo desde a oposición é moi importante e ben feito dá os seus froitos. A oposición serve tamén para transmitir o noso discurso político", esgrimiu.
Convencida de que Feixoo é o pasado, a líder nacionalista proclamou que só o Bloque é garantía dun cambio real nese novo tempo político que levará o PP á oposición
Convencida de que Feixoo é o pasado, a líder nacionalista proclamou que só o Bloque é garantía dun cambio real nese novo tempo político que levará o PP á oposición.
“Para abrir este novo ciclo é condición necesaria desaloxar o PP, pero iso só non chega. Para abrir un novo tempo, o BNG ten que liderar a Xunta porque somos a garantía dun cambio real e transformador, de políticas ao servizo das maiorías sociais, capaces de enfrontar os cambios estruturais que a Galiza necesita”, explicou Pontón.
Pontón sinalou que “PP, PSOE e Podemos comparten un deseño centralista que nos prexudica como país”
Nese sentido, afirmou que as e os nacionalistas “ofrecemos algo único e importante: un proxecto de país, xenuíno e pensado desde a Galiza, que aposta por aproveitar o enorme potencial e a capacidade que temos”, recalcou.
Salientou ademais que a solución aos problemas polos que o país atravesa “non vai vir de fóra” da man de forzas españolas “que teñen convertido nun triste espectáculo a política estatal”. A ese respecto Pontón sinalou que se repite “a mesma historia, pois fálase de todo menos do problemas da Galiza e das solucións a eses problemas”, e engadiu que “PP, PSOE e Podemos comparten un deseño centralista que nos prexudica como país”.
Cara a un masivo Día da Patria Galega
A líder nacionalista chamou a facer do vindeiro 25 de xullo a primeira gran mobilización para impulsar o BNG e conquistar a Xunta en 2020 “logrando que nin unha soa persoa que queira cambio en clave de país quede na casa”. Pontón afirmou que “a esperanza é o motor que hai que poñer a funcionar para transmitir que nada é imposíbel e que o avance do proxecto nacionalista é imparábel. Estou convencida que entre todos e todas imos conseguir este obxectivo”, proclamou.
