“Podemos será o nome e eixo articulador da candidatura do cambio nas xerais”

Nunha carta aberta na que aluden aos resultados “non satisfactorios” das eleccións catalás, os responsábeis de Podemos, Pablo Iglesias e Íñigo Errejón, aseguran que “Podemos será o nome e o eixo articulador da candidatura do cambio para as eleccións xerais”. Desta maneira, o partido político reafírmase na súa idea de concorrer aos comicios do 20-D coa súa propia marca na papeleta.

Iglesias e Errejón reiteran que o feito de non presentarse en Catalunya como Podemos supuxo un problema. Neste documento, chegan a afirmar que Catalunya Si Que Es Pot, nome co que concorreron Podemos, Iniciativa per Catalunya Verds, Esquerra Unida i Alternativa, era un “nome difícil”.

“Temos a convición de que moita xente que está esperando ás xerais para votar Podemos non nos atopou o domingo entre as papeletas dos colexios electorais”, apuntan ambos os líderes na carta aberta. Engaden que “a panca para multiplicar forzas e tender a man a moita xente distinta polo cambio política e a recuperación da soberanía popular ten un nome fraguado neste nada sinxelo ano”.

Na misiva, Iglesias e Errejón volven lembrar a postura de Podemos sobre a soberanía das nacións. “España é un país plurinacional, onde conviven pobos con identidades diferentes, e nós queremos construír un futuro de soberanía popular con todos, xuntos…”.