Podemos Galiza designará secretario xeral e nova directiva o 12 de abril

Breogán Riobóo insiste en que o seu cargo non hai que renovalo. A xestora establece que para poder optar aos órganos internos, tanto sexan candidaturas individuais como listas, haberá que contar co aval de, polo menos, un círculo ou algún órgano interno. 

marea podemos tone angela
photo_camera Gómez-Reino e Ángela Rodríguez, deputados de Podemos en 'En Marea'

A xestora que dirixe Podemos Galiza desde a disolución dos seus órganos directivos pola dirección estatal finalizou xa o deseño do calendario para o proceso de primarias, proceso que renovará dirección e designará novo secretario xeral.O actual secretario xeral, Breogán Riobóo, mantivo durante estes días o seu argumentio de que este cargo non hai que renovalo neste proceso.

O regulamento da xestora establece que do 15 de marzo ao 10 de abril elixirase unha persoa para secretario xeral, 34 membros do Consello Cidadán Autonómico e seis da Comisión de Garantías Democráticas. Os resultados serán proclamados o 12 de abril.

Avais

Para poder optar aos órganos internos, sexan candidaturas individuais ou listas, haberá que contar co aval de, polo menos, un círculo ou algún órgano interno de Podemos Galiza. O prazo para conseguilos transcorrerán entre o 15 e o 28 de marzo.

Entre o 28 e o 30 de marzo ábrese o prazo para a inscrición de candidaturas. As persoas e listas que queiran participar poden realizar o trámite a través dos espazos telemáticos habilitados por Podemos. No caso da secretaría xeral deberá incluír un documento político-organizativo. Un dos requisitos é que as listas deben ser presentadas en listas cremalleira e de xénero e ter unha composición paritaria, tal e como consta no regulamento.

Campaña

A campaña electoral das candidaturas continuará entre o 4 e o 10 de abril. Nos últimos días de campaña, estarán abertas as votacións por vía telemática (entre o 8 e o 10 de abril) e a proclamación das candidaturas será o martes 12 de abril.No regulamento interno tamén se recolle que os círculos e órganos internos deberán manter a súa neutralidade. Esta situación o que implica é que dende as contas oficiais (redes sociais, correo electrónico e outros) non se poderá facer difusión de candidaturas concretas, senón que "soamente do proceso no seu conxunto".

Listas

Segundo o regulamento interno, ao que tivo acceso Europa Press, a elección ao Consello Cidadán e á Comisión de Garantías realizarase a través de listas abertas, de maneira que aínda que se presenten listas completas, cada elector poderá elixir ou vetar os integrantes desas candidaturas.


 

A INFORMACIÓN GALEGA ESTÁ NA TÚA MAN!

Subscríbete ao noso boletín de novas.

Date de alta de balde e recibirás unha selección dos nosos artigos para saberes o que acontece.

comentarios