xoves 09.07.2020

O PNV perde en favor de EH Bildu o escano que lle garantía a maioría co PSE

O reconto do voto dos residentes ausentes outorga en Bizkaia un deputado máis á esquerda abertzale, deputado que perden os 'jelkides'. Urkullu terá que tecer novas alianzas se quer estabilidade parlamentar.

EH Bildu no brinde polo novo escano
EH Bildu no brinde polo novo escano

O Parlamento vasco contará finalmente con 28 escanos do PNV (e non 29) e 18 de EH Buildu (e non 17), un cambio de deputado propiciado polo reconto en Bizkaia dos sufraxios dos residentes ausentes e que altera totalmente o escenario político que saíra das urnas o 25 de setembro. Con este cambio, o PNV xa non ten garantida a maioría co PSOE e iso obriga a novos retos.

Con estes novos resultados na man, Urkullu vai ter, se quere estabilidade parlamentar, que tecer novas alianzas. Xa non lle val recorrer á baza do PSE, non lle chega. Así que terá que dar outros pasos. Como procurar o apoio tamén do PP, ademais do PSOE, con todon o que iso pode implicar, mesmo a nivel de gobernabilidade no Estado. Ou pode tentar o PNV un acordo ou alianza con EH Bildu, o que non semella moi do gusto de Urkullu. Mesmo a baza de Podemos pode estar sobre a mesa dos jelkides.

EH Bildu falou de “xustiza poética e política” ao obter este escano tan decisivo e reiterou a súa oferta ao PNV e Podemos para conformar unha “maioría do cambio” polo dereito a decidir. Desde o PNV aceptan a perda do escano, que non van recorrer, mais lembran que son, con diferenza, a forza política máis votada. 

comentarios