Pedro Sánchez compareceu esta cuarta feira (23 de decembro) perante os medios de comunicación após o encontro que mantivo na Moncloa co presidente español en funcións, Marino Rajoy.
O secretario xeral do PSOE asegurou que o seu partido non apoiará "a continuidade do Partido Popular" á fronte do executivo embora, dixo, como partido maioritario ten a posibilidade de procurar apoios para formar goberno. De o conseguir, Sánchez di que o PSOE asumirá o papel de "líder da oposición". Porén, a composición da Cámara baixa após as eleccións do 20 de decembro déixanlle @s populares pouca marxe de manobra. Neste escenario, @s socialistas tamén tentarán facerse co executivo español para, defendeu Sánchez, dar "abertura" a unha "nova etapa política" cun "goberno de cambio", "progresista" e asentado no "diálogo".
"Non imos aceptar a hipótese de novas eleccións" apuntou facendo referencia a aquelas forzas políticas, no concreto Podemos, que teñen amosado nas últimas horas a súa disposición a unha nova convocatoria electoral. Fronte a iso, Pedro Sánchez ofreceu "tender pontes" e avanzou, explorarán posibilidades de goberno.
Aliás, reclamou para a súa formación a presidencia do Congreso e asegurou que traballarán para que a composición da Mesa reflicta a "pluralidade" da Cámara, nunha chiscadela a Podemos e Ciudadanos.
Asemade ofreceu unha "reforma constitucional" para resolver "o conflito" con Catalunya mais baseada na "soberanía nacional" de "todos os españois".