O presidente do Goberno español, Pedro Sánchez, anunciou o adianto das eleccións estatais para o próximo 23 de xullo tras asumir persoalmente a derrota electoral sufrida este domingo polo PSOE nas eleccións municipais.
Nunha declaración institucional sen preguntas en Moncloa, Sánchez informou de que falou co rei Felipe VI para comunicarlle a convocatoria dun Consello de Ministros extraordinario e a disolución das Cortes.
"Asumo os resultados", dixo o presidente do Goberno, que optou por someter polo "mandato democrático á vontade popular".
O PSOE perdeu este domingo as eleccións municipais por tres puntos fronte ao PP e cedeu boa parte do poder territorial do que dispuña até o de agora, ao perder seis das nove comunidades autónomas que gobernaba.
Só Emiliano García-Page retivo con maioría absoluta Castela-A Mancha, mentres que os socialistas poderán seguir tamén á fronte de Asturias, con apoio de EU e Podemos, e de Navarra, onde María Chivite xa adiantou que buscará o respaldo dos seus actuais socios.
Menos de dous meses
Esta decisión de Sánchez chega xusto un día despois dos comicios locais e a data escollida sitúase a menos de dous meses. Ademais, a votación terá lugar só dous días antes da celebración do Día da Patria Galega.
