Apenas quedan horas para que abran os colexios electorais. A campaña chegou á súa fin e as e os líderes políticos que aspiran a presidir Galiza despedírona chamando a votar polas súas candidaturas ante a expectación do que digan as urnas este domingo: ou cuarta lexislatura para Alberto Núñez Feixoo ou un Goberno liderado por Ana Pontón, por Gonzalo Caballero ou por Antón Gómez-Reino.
Feixoo pide unha nova maioría absoluta
O candidato do PP puxo o ramo á campaña electoral cun mitin en de Ferrol, logo de percorrer durante a sexta feira as outras seis cidades galegas. En todas elas repetiu a mesma mensaxe: "votade sen medo" ao virus. Galiza terá un Goberno que "siga gobernando coa pandemia e traballando para recuperar o emprego como prioridade", dixo o candidato popular.
"Neste momento é imprescindíbel ter un equipo que poida construír un Goberno no momento de maior dificultade e de incerteza", subliñou Feixoo.
“Quen queira cambio que me siga”, di Pontón
Na Praza de María Pita (A Coruña) fechou a campaña a candidata do BNG, Ana Pontón, cun chamamento final á "mobilización masiva de todas as persoas que desexen abrir un tempo novo" e proclamou: "quen queira cambio galego que me siga”, apelando “a confiar nas nosas propias forzas para construír unha nova Galiza”.
“Quero pedirvos que fagamos historia concentrando no BNG todo o voto do cambio galego, que fagamos historia cunha muller presidenta liderando un Goberno coas mans libres para defender o noso futuro, o futuro da xente moza; que fagamos historia votando con ilusión, con esperanza, con orgullo para construír unha Galiza na que vivir, traballar e soñar. Fagamos historia votando BNG”, solicitou ante unha praza ateigada.
A candidata do Bloque pediu non deixarse influír por quen di que o resultado está escrito: “non aceptades un 'non' nin que vos digan que non hai futuro, porque o futuro non se escribe nas enquisas, escribímolo todas e todos, o pobo galego enchendo as urnas de votos ao BNG, para ter un Goberno leal con este país e coa súa xente", dixo.
Pontón fixo unha apelación directa á xente moza, animándoa "a conquistar nas urnas o futuro". A nacionalista instou a xuventude a mobilizarse para que non lle rouben o futuro "os de sempre, coas mesmas políticas fracasadas, merecedes un futuro digno, no que non teñades que elixir entre precariedade ou coller as maletas”, proclamou.
Caballero pon o PSdeG como o voto útil
O candidato do PSdeG á presidencia, Gonzalo Caballero, fechou no parque de Castrelos, en Vigo, a campaña electoral, asegurando que a "política da confrontación e a deslealdade" que caracteriza a acción de Feixoo é "parte do problema" dunha Galiza que hai que "desatascar" sacando o Partido Popular da Xunta e desfacendo o "funil" que o seu Goberno implica.
"Quero presidir Galiza para reconstruír un país loitando contra a desigualdade, defender a cidadanía que está en situacións de maior vulnerabilidade e fortalecer os servizos públicos como a sanidade e a educación".
"Compoñente galeguista, reformista e socialdemocracia", eis a receita que a Galiza precisa, dixo Caballero, que asegurou sentirse orgulloso das siglas do Partido Socialista fronte a un Feixoo que "agocha" o logo do PP.
O candidato do PSdeG asegurou ademais que hai unha maioría na cidadanía galega que quere cambio e para logralo "é necesario o voto útil de todos os progresistas ao PSdeG", aseverou.
"Non somos nacionalistas, somos galeguistas, non somos rupturistas, somos reformistas e somos socialistas", apostilou.
A pesar de estar confirmada a presenza do presidente do Goberno español, Pedro Sánchez, finalmente non puido chegar ao mitin. "Lamento non poder viaxar a Vigo por unha avaría técnica no avión para estar cos compañeiros e compañeiras do PSdeG, apoiando o noso candidato Gonzalo Caballero", sinalou o mandatario na súa conta de Twitter. "Fagamos que Galiza avance o 12-X. Enchamos as urnas de votos socialistas!", engadiu Pedro Sánchez.
Reino apela o 'Nunca Máis' para despedir Feixoo
O candidato de Galicia en Común, Antón Gómez-Reino, proclamou no fechamento da campaña que "en tan só 48 horas abriremos paso á Galiza do futuro e deixaremos atrás a década escura de Feixoo cun Goberno galego que poña a xente no centro das súas políticas".
En Compostela, na Praza de Praterías, Reino destacou que “a Galiza que vén, xa está aquí, unha Galiza que coida de quen nos coida; que blinda os servizos públicos, o emprego de calidade e o seu tecido industrial onde agora atopamos cadaleitos; a Galiza que protexe o medio e loita contra o cambio climático, a Galiza que non recúa nos dereitos das mulleres, do rural vivo e a que quere uns medios públicos sen manipulación".
Con Reino estivo tamén a ministra de Traballo, Yolanda Díaz, que puxo en valor as políticas do Goberno español como "escudo social". Tamén acudiu a Compostela a alcaldesa de Barcelona, Ada Colau, así como as e os catro cabezas de lista ao Parlamento.
Casal reivindica a Marea como terceira vía
A Marea Galeguista escolleu a cidade de Pontevedra para pór o ramo á campaña electoral. O seu candidato á Presidencia da Xunta, Pancho Casal, cualificou a formación como “a terceira vía que vai romper coa polarización” e rematar coa maioría absoluta de Núñez Feixoo. Casal relatou ademais as propostas da Marea a prol de fortalecer os servizos públicos e concluíu aseverando que "as certezas de Núñez Feixoo non son verdades, son corsés para o país”.
Pino quere "pór as pilas a Feixoo"
“Este domingo daremos a sorpresa para pór as pilas a Feixoo”. Así o asegurou a candidata de Ciudadanos, Beatriz Pino, desde Pontevedra no fechamento de campaña. Pino lembrou que Ciudadanos gañou "ao nacionalismo en Catalunya con Inés Arrimadas e ao PSOE en Andalucía" e animou a lograr a entrada da forza laranxa no Goberno da Xunta.
