Marca histórica en Catalunya, cunha suba de 11,2 puntos

A participación sitúase até as 14 horas no 36,97%, case tres puntos máis que en 2016

Os primeiros dados de participación nas eleccións ofrecidos polo Ministerio do Interior reflicten unha suba a respecto da participación rexistrada até as 14 horas nos comicios do 26 de xuño de 2016. Votou o 36,97% do censo.

sANTA CRUZ 640
photo_camera [Imaxe: SG] Primeira hora da mañá no colexio electoral de Santa Cruz de Oleiros.

As primeiras cifras de participación nas eleccións xerais, comunicadas polo Ministerio do Interior, reflicten unha suba de máis de case tres puntos porcentuais a respeito da cita electoral do 26 de xuño de 2016, cando a estas horas votara o 34,03% do censo electoral.

Até as 14 horas votou hoxe na Galiza o 36,97%, 2,9 puntos porcentuais de diferenza a respecto da participación rexistrada nos anteriores comicios, os que tiveron lugar o 26 de xuño de 2016.

Por circunscricións, na Coruña a porcentaxe de participación entre as 9 horas e as 14 horas situábase no 36,64% cando en 2016 se situaba no 33,29%. En Lugo, a participación era do 35,21 e en 2016, do 31,19%. En Ourense rexistrouse un 37,87% de participación fronte ao 34,73% das anteriores xerais. E en Pontevedra votou entre as 9 horas e as 14 horas desta xornada o 37,70% cando en 2016 a participación era do 35,85%.

No conxunto do Estado a suba é de 4,6 puntos

A nivel estatal, o aumento da participación aínda é maior. Até as 14 horas votou o 41,49% do censo, cando até a mesma hora en xuño de 2016 votara o 36,87%, 4,6 puntos máis.

Nas outras nacións sen Estado, a participación tamén é maior. En Catalunya o incremento foi de 11,2 puntos e marca un récord histórico. Así, mentres en 2016 a porcentaxe era de 32,31%, en 2019 chega ao 43,52%. En Euskadi a suba é algo menor que no caso catalán. Votou o 41,75% do censo, fronte ao 36,05% das pasadas xerais.

As seguintes cifras de participación coñeceranse ás 18.30 horas e as finais, ás 20 horas, cando fechen os colexios electorais. En 2016, a participación acadara na Galiza o 69,63% e nas anteriores, as de decembro de 2015 situárase no 61,53%. O Ministerio do Interior informará dos resultados provisionais das eleccións pasadas as 22 horas.

Comentarios