O Parlamento deberá posicionarse sobre a repartición das cotas pesqueiras

O BNG insta o goberno de Galiza a rexeitar os criterios actuais e reivindicar a súa soberanía sobre as augas interiores.

2007 11 15 o grove pesca mar21105
photo_camera [CC BY-NC-SA CIG-Avantar ]

O portavoz de Pesca do Bloque no Parlamento de Galiza, Daniel Rodas, defenderá esta terza feira en sesión plenaria unha Proposición Non de Lei (PNL) sobre o rexeitamento do actual modelo de repartición da cota pesqueira.

Os criterios de reparto, acordados polo Consello de Ministros da Unión Europea "está a imposibilitar a supervivencia" do modelo pesqueiro galego, afirman desde a organización frontista. Un modelo caracterizado pola existencia de "máis de 4.900 embarcacións" das que "máis do 80% son menores de 15 metros" de eslora. 

Perante esta realidade a fixación do TAC's de acordo a criterios históricos e non socioeconómicos "está a provocar o desmantelamento" do sector que, como reflectiu o conflito coa frota do cerco, atravesa unha situación límite.

Peixe no mar mais sen poder pescar

E é que a repartición da cota para pesquerías como a da xarda --que contou co visto e prace do Goberno español e o aplauso da Consellaría de Pesca da Xunta de Galiza-- deveu no paradoxo de contar con peixes no mar que non podían ser pescados polos mariñeiros galegos. 

En 10 días que durou a campaña da xarda, a maior parte das capturas foron parar a outras frotas do noroeste cantábrico, "cando o banco chegou as nosas costas atopámonos coa crueza de non podermos pescar" malia haber peixe "que mallaba nos aparellos" e que tiña que ser devolto ao mar "morto", explica o BNG na súa PNL. 

Para a fronte nacionalista situacións coma esta urxen o rexeitamento do actual modelo de repartición das cotas pois, explican, é "negativo para os intereses pesqueiros galegos". Así pois, instan o goberno da Xunta a se posicionar en contra perante Bruxelas e a exixir á UE que non se aplique "nas augas interiores de Galiza" e, polo tanto, "sobre a frota artesanal" pola consideraren "unha invasión competencial" de acordo co propio Estatuto de Autonomía. 

Comentarios