O manifesto conxunto urxe o Goberno a tomar medidas alternativas á privación de liberdade para garantir o dereito á saúde das persoas presas durante a emerxencia sanitaria polo Covid-19 e expoñen tanto a posibilidade de excarcerar como de achegar a cárceres dos seus lugares de procedencia.
En concreto, no documento titulado 'Polo respecto aos dereitos das persoas privadas de liberdade' demándase ao Executivo español que proceda a excarcerar a presos con patoloxías previas serias, crónicas ou agravadas pola idade (maiores de 65 anos).
Tamén pide sacar dos cárceres aos que cumprisen as tres cuartas partes da súa condena, con independencia da gravidade do delito que cometesen, sempre que non presenten un alto grao de reincidencia e/ou teñan un prognóstico favorábel de reinserción social, "con recursos familiares ou da súa contorna social próximo, para someterse ao confinamento nos mesmos termos que o resto da sociedade".
Así mesmo, instan o Goberno a reforzar as medidas de protección nos centros penais, realizar diagnósticos rápidos a reclusos para previr e evitar a propagación do virus en prisión, derivar inmediatamente a centros hospitalarios da rede pública a quen presenten síntomas ou dean positivo en coronavirus e ofrecer información actualizada e accesible aos internos sobre o desenvolvemento da enfermidade.
Fin da dispersión
Outra das súas demandas é que se proceda a achegamento xeneralizado de presos que así o soliciten a prisións próximas aos seus domicilios e familias, empezando polos que cumpren condena máis afastados dos seus domicilios e polos pais e nais con fillos menores.
Estes nove partidos piden tamén que, durante a fase de desconfinamento, os presos poidan retomar as comunicacións directas coas súas familias e avogados. Neste sentido, demandan que se estenda a comunicación non presencial entre internos e familiares con chamadas gratuítas e ampliando as videollamadas sen as limitacións actuais.
Os asinantes do manifesto piden atender as propostas de organismos internacionais como a Organización Mundial da Saúde, a Alta Comisionada para os Dereitos Humanos e o Subcomité para a Prevención da Tortura, a Comisaria de Dereitos Humanos do Consello de Europa, ademais de organismos nacionais.
