"É inadmisíbel que o PP non teña obrigado a dimitir a González Capón". Afirmou o voceiro do BNG en Baralla, Xosé Manuel Becerra. E é que o partido ao que pertence o alcalde desta localidade luguesa segue sen condenar as afirmacións deitadas polo rexedor. Neste senso, o Bloque e PSdeG solicitaron a celebración dun pleno extraordinario cun único punto na orde do día no que exixirán a saída de González Capón da corporación municipal.
O PP non condenou as afirmacións do alcalde de Baralla
As declaracións do popular "degradan as vítimas do franquismo en particular e a calquera demócrata en xeral", apuntan desde o PSdeG de Baralla e "defenden un réxime totalitario" acrecentan desde o BNG.
Ambas as dúas formacións entenden que Manuel González non pode continuar á fronte da equipa de goberno e promoverán a súa demisión pois as súas afirmacións, aseguran, "non son unha mera saída de ton" froito dun "debate desmadrado" --como afirmou poucos días despois o propio alcalde-- senón que supoñen unha "atrocidade".
Promoverán a destitución de González Capón como rexedor e deputado provincial
![Publicidade 195255]()
Desde o BNG anuncian que levarán a todos "os plenos municipais da provincia" unha moción a prol da destitución do alcalde González Capón, que ocupa tamén un escano na Deputación de Lugo. Para @s nacionalistas as afirmacións do popular "constitúen un ataque a todas as vítimas do franquismo, que só na nosa provincia superan as 3.000 persoas, así como ás súas familias"
