A valedora do pobo, María Dolores Fernández Galiño, compareceu esta terza feira, 6 de outubro, no Parlamento para presentar a Memoria correspondente ao ano 2019. As formacións da oposición (BNG e PSdeG) reprocharon ao Goberno galego a "pouca colaboración" que mantén coa institución.
Daniel Castro, deputado do BNG, alertou contra o "número importante" de recordatorios de colaboración -un total de 36- emitidas pola Valedoría á Administración galega ao longo do ano. Por iso mesmo, o parlamentario nacionalista instou Galiño a "exixir un maior grao de responsabilidade" ás institucións galegas.
"A algunhas Consellarías hai que insistirlles ante os requirimentos", censurou na mesma liña a socialista Isaura Abelairas.
O informe da Valedoría reflicte que o número de queixas tramitadas pola institución descendeu case 70% ao cursárense 6.250, en comparación ás 20.807 xestionadas en 2018.
Por áreas, destaca o aumento das presentadas ante accións do departamento de Infraestruturas e Mobilidade da Xunta, que aglutinaron (29,63%) dos 5.270 expendientes que afectan a Administración galega. Política Social é a consellaría con máis queixas, con 1.598 (30,33%).
Galiño expuxo o traballo realizado en 2019, remarcando o decálogo que puxo en marcha ao acceder ao cargo e que se enmarca na "promoción e defensa dos dereitos das persoas" en diferentes ámbitos. En materia de dereitos lingüísticos, foron 48 as queixas recibidas neste sentido, das que 24 foron a instancia da Mesa pola Normalización Lingüística e do Observatorio de Dereitos Lingüísticos. O PP solicitou á valedora que realice un "informe extraordinario" sobre as "okupacións ilegais de vivenda".
Galiño foi designada valedora a mediados do pasado ano, após a dimisión de Milagros Otero, catro meses despois de que o Tribunal Supremo desestimase o seu recurso contra a condena pola designación na Valedoría de María Puy.
