Que os activos tóxicos do denominado 'banco malo' (a Sociedade de xestión de activos procedentes da reestruturación bancaria) poidan empregarse para pór en funcionamento un plan de vivenda pública. É esta unha das propostas que o grupo parlamentar do BNG defenderá esta terza feira no pleno da Cámara, a través dunha proposición non de lei con medidas urxentes contra as execucións hipotecarias que veñen de presentar o voceiro da formación frontista, Francisco Jorquera, e o deputado e voceiro de Vivenda, Cosme Pombo.
Así as cousas, este primeiro paso que, de ser apoiado, iría ao Congreso d@s deputad@s, procura como obxectivo frear os despexos e paliar a situación de emerxencia social que deriva dos datos oficiais: en 2011 a banca botaba da casa por volta de 6 familias ao día. A cifra aumentou até as 11 no primeiro trimestre do ano pasado. As familias afectadas na Galiza serían máis de 8 mil.
A proposición lexislativa do BNG pretende unha reforma da normativa hipotecaria e civil que evite que a falta de ingresos dunha familia se traduza na perda da súa vivenda. Así o explicou Pombo, debullando os cambios normativos que se achegan para que o parque de inmóbeis baleiros que son titularidade dos bancos rescatados con cartos públicos se destinen a promover políticas de vivenda social accesíbeis para as persoas con menos ingresos.
Para alén do xa sinalado, Jorquera e Pombo acrecentaron que na proposición que levan ao pleno do Parlamento tamén se reclama a dación en pagamento como maneira de cancelar a totalidade da débeda hipotecaria, de tal xeito que a perda de valor do inmóbel fique asumido pola entidade bancaria que taxou "artificialmente" por riba do valor real.
Tamén se introduce a negociación para a moratoria do pagamento, axustando os prazos pactados á situación económico; así como a transformación dun contrato de arrendamento con opción de compra ou condoación da débeda. Por derradeiro, explicou Cosme Pombo que se alenta, así mesmo, á modificación dun artigo do Código civil para evitar situacións como a de traballador@s do agro que, "por unha pequena débeda", teñen que responder até coas súas terras, podendo o banco facerse con elas "a prezo de saldo".
As prioridades do PP: contra a dación en pagamento, a favor de que as touradas fiquen protexidas
A proposición do BNG debaterase no Parlamento galego cadrando coa chegada ao Congreso español das dúas ILP que abrirán o periodo ordinario de sesións. A primeira, presentada pola Plataforma de afectad@s pola hipoteca, persegue tamén a dación en pagamento. Malia ficar avalada por 1,4 millóns de sinaturas, o PP votará en contra.
Porén, dará o seu voto a prol da segunda ILP, a presentada pola Federación de entidades taurinas de Catalunya para darlles ás touradas a categoría de Ben de interese cultural, BIC, isto é, tornar estes espectáculos en festas protexidas. Tal recoñecemento deixaría sen efecto a prohibición de organizar corridas en territorio catalán, vixente desde xaneiro de 2012.