Unha nova enquisa de El País coloca Cs moi por cima do PP

La Voz de Galiza, en troca, pon Ciudadanos como cuarta forza política en Galiza nunhas eleccións xerais, embora rexiste un significativo aumento sobre a convocatoria eleitoral de xuño de 2016.

Albert Rivera en Vigo (Foto: Ciudadanos)
photo_camera Albert Rivera en Vigo (Foto: Ciudadanos)

A distancia entre Ciudadanos e PP comeza a ser sideral, 7,4 pontos en estimación de voto, segundo o último inquérito de Metroscopia para El País dado a coñecer este domingo. A marca liderada por Albert Rivera obtería 28,9 por cento das papeletas válidas face 21,5 por cento das conquistadas polas candidaturas do PP. Sería un envorcamento radical a respeito dos resultados de xuño de 2016. Naquela altura o PP conseguiu 33,03 por cento dos sufraxios face 13,05 de Cs.

Na esquerda e centro-esquerda de ámbito estatal, o PSOE fica en 19,4 por cento (3,26 pontos menos que en 2016) e Unidos Podemos e as confluencias retroceden até 17 por cento dos sufraxios (4,1 por cento menos que nas últimas xerais).

O panorama en realidade é o seguinte: PP, PSOE e UP perden conxuntamente 7,49 por cento do voto, en tanto que Cs incrementa 15,85. E isto nun contexto de relativa desmobilización do eleitorado. Metroscopia prognostica unha participación de 66 por cento das persoas con direito a voto, 4 pontos menos que en 2016. As desercións danse basicamente no eleitorado do PSOE (27 por cento de ex votantes declaran que desta volta non irán aos colexios eleitorais) e do PP (19 por cento).

Metroscopia rexista tamén un claro escorregamento do eleitorado cara á dereita. En 2016 a suma PP e Cs atinxía 46,1 por cento das preferencias das e dos eleitores. Agora esa cifra sobe até 50,5 por cento.

Galiza

Mentres tanto, un inquérito de Sondaxe -a empresa demoscópica de La Voz de Galicia- rebaixa as expectativas de Cs no noso país. Aquí a formación laranxa incrementaría os seus apoios, mais sensibelmente menos do que en España. Ascendería 4 pontos, até se situar en 12,6 por cento dos votos. Incrementarían tamén apoios En Marea (0,8 por cento até rexistar 23 por cento dos sufraxios) e BNG (1,2 por cento de incremento, 4,1 por cento dos votos).

La Voz prognostica o pior resultado do PP na Galiza nunhas xerais desde que este partido se conformou como tal en 1989: 36,9 por cento dos sufraxios (cede 4,6 pontos a respeito de 2016), en tanto que o PSOE ficaría en 19,8 por cento (2,4 pontos menos).

11,2 por cento das e dos antigos votantes do PP decantaríanse polo partido laranxa, en tanto que a fuga de votos socialistas cara á formación liderada por Albert Rivera sería de 10 por cento.

Comentarios