Xunto a un grupo de mulleres, entre as que estaban as membros da candidatura Olaia Fernández e Helena Pérez, Carme Adán anunciou que Nós, Candidatura Galega levará ao Congreso a proposta para elaborar Estatuto da Vítima do Feminicidio co fin de que "se recoñeza que as mulleres son asasinadas polo feito de seren mulleres e para que se lles recoñeza os seus dereitos sociais”. Tamén reclamará que "cada un dos xulgados de violencia de xénero conte cos medios necesarios”.
Con cartaces co lema “Paremos o feminicidio” e "Reforma da lei xa", as mulleres de Nós, Candidatura Galega denunciaron ao pé os Xulgados de Vigo o recorte de partidas contra a violencia de xénero nun 26% e reivindicaron o incremento de recursos, nomeadamente nos Xulgados de Violencia de Xénero. “Non sei se mañá o PP se vai pór algún tipo de lazo polo 25-N, pero se o fai debería pensar nos recortes que o Goberno de Mariano Rajoy fixo en prevención e tratamento da violencia de xénero: un 26% menos nos orzamentos, e un 61% menos para igualdade”, sinalou a candidata.
Carme Adán: "Mañá, cando se coloquen o lazo contra a violencia de xénero teñen que pensar se se dotou aos Xulgados dos medios necesarios"
![Publicidade 195634]()
Na mesma liña, Carme Adán salientou, “mañá, cando se coloquen o lazo contra a violencia de xénero teñen que pensar se se dotou aos Xulgados dos medios necesarios, se está a escoitar ao que di a xuiza de violencia de xénero de Vigo sobre as necesidades neste xulgado en concreto, pero tamén no resto de Galiza”. “Mañá cando os candidatos e candidatas do PP, incluída Ana Pastor, se poñan o lazo deben pensar se o Goberno do que ela formou parte estivo realmente comprometido con este grave problema”, engadiu.
Carme Adán tamén cargou contra o PP por “practicar exercicios de última hora, pois de nada serve que no último Consello de Ministros falaran da violencia de xénero porque durante 4 anos esqueceron as mulleres que sofren violencia machista, esqueceron as vítimas”.
Alén das necesidades en materia xudicial, a candidata de Nós, Candidatura Galega referiuse ás eivas que sofre o eido psicolosocial, “a día de hoxe hai un atraso de 18 meses nos expedientes”. En relación a isto, puxo de manifesto que “se de verdade se está contra o feminicidio, é imprescindíbel que se dote dos recursos humanos e materiais necesarios. Non hai escusa posíbel”.
