Nunha entrevista concedida a Radio Coruña-Cadena Ser, Jorge Suárez apostou en resolver, de “forma inmediata”, a incógnita do candidato da Marea á presidencia da Xunta. Avogou en que a candidata ou candidato “non sexa sometido a ningún proceso de primarias”, pois quere que sexa “de consenso”.
Para o alcalde de Ferrol o ideal sería unha candidata, muller, de consenso, de esquerdas, unha cara nova, “un rostro amábel pero decidido”. Porén, non quixo dar nomes. Preguntado pola xornalista sobre se aludía a Yolanda Díaz, Suárez negouno. Dixo ao respeito que Díaz “vai facer un papel moi importante no Congreso. Creo que o seu lugar está aí e creo que non vai ser candidata”.
Preguntado sobre se ve a Beiras como candidato, Jorge Súarez, que apuntou que “Beiras e eu temos unha magnífica relación” e que “nos queremos moito”, admitiu que non o ve como candidato á presidencia da Xunta.“Non quero que o tome como un menosprezo, pero debe xogar outro tipo de papel máis alá da candidatura”. Concluíu advertindo de que “non son quen de poñer vetos a ningunha situación”.
"Quedan matices que interesan a un núcleo reducido de persoas de manter estatus ou siglas"
En relación ao debate sobre a fórmula de concorrencia da Marea ás eleccións galegas, Jorge Suárez apuntou que dá por feito que “acordo hai” pero recoñeceu que “quedan matices que interesan a un núcleo reducido de persoas de manter estatus ou siglas”.
O alcalde de Ferrol comparou a situación que viven as forzas que conforman a Marea coa película A vida de Brian, “cando un conglomerado de partidos trata de buscar un punto en común acontece como na Vida de Brian. Non sabemos como imos acabar, pero para min é secundario [o debate sobre a fórmula de concorrencia ás galegas] e o importante é o programa”.
