Co poema Á Patria, de Manuel María, comezaba o discurso de clausura do XIV Congreso da UPG o seu secretario xeral, Néstor Rego, que insistiu na necesidade da auto-organización do pobo para acadar a liberación social e nacional.
“O noso camiño non pasa por poñer as esperanzas como pobo no que poidan decidir en Madrid ou no que acontecer na Porta do Sol. Desde 1916, o nacionalismo galego entendeu que a liberdade de Galiza depende exclusivamente de nós”, afirmou xa ao inicio da súa intervención. Referiuse non só ao caso do país, senón tamén a casos alleos, para explicar como ao longo da historia as nacións que acadaron a independencia sempre o fixeron arredor da “auto-organización e da confianza”.
"A Galiza de hoxe sería peor sen o contributo imprescindíbel do nacionalismo"
Aludiu tamén "ao momento complexo" que vive o nacionalismo galego, mais advertiu de que existe “unha base moi sólida sobre a que continuar a traballar”. Nesta liña, salientou que “con todos os problemas e dificultades que combatemos todos os días, a Galiza de hoxe sería peor sen o contributo imprescindíbel do nacionalismo. E tamén dicimos desde a modestia que o nacionalismo galego contemporáneo, que é unha construción colectiva de milleiros de persoas, non sería o mesmo nin se podería entender tal e como é sen o contributo do traballo xeneroso da UPG”.
Modas pasaxeiras
Néstor Rego lembrou que o nacionalismo “naceu non para acatar máis que os intereses da nación” e a “vontade da liberdade do pobo”. “Non temos ningún interese nas modas pasaxeiras” nin “en participar do festival de palabras ocas nin no “show do prime time televisivo”, engadiu. Fronte a isto, defendeu que o nacionalismo é un proxecto “serio e rigoroso” que “é consciente das enormes potencialidades do noso país” e que “confía plenamente na capacidade do pobo galego para tomar conta por si no seu propio destino”.
"É preciso reforzar un proxecto nacionalista que aposte na conquista da soberanía e que se sustente como sempre fixo na práctica da auto-organización do pobo galego"
Apuntou que a UPG “concordou moito” co proceso de refundación do BNG, un proceso “que partía de certezas que cumpría manter: que Galiza é unha nación e que ten dereito á autodeterminación como maneira de chegar á independencia e de obter a soberanía”. Subliñou que “é preciso reforzar un proxecto nacionalista actuante na sociedade, que aposte, sen ideoloxismos estériles e de maneira decidida, na conquista da soberanía; que se sustente como sempre fixo na práctica da auto-organización do pobo galego e que aspire a conquistar novos espazos e novos continxentes desde a base de sumar forza e pluralismo”. Néstor Rego afirmou que “non hai nada novo nesta posición”, que “segue a ser revolucionaria, porque vai contracorrente e cuestiona desde o máis profundo a lóxica do poder”.
Aliás, puxo de manifesto que a UPG participa de maneira activa no proceso de debate do BNG para afortalar o pluralismo e alargar a base militante. Dixo ao respeito que “o pluralismo é un dos grandes valores positivos do nacionalismo” e ratificou o compromiso do partido a contribuír a reforzalo. Lembrou, a continuación, que o Bloque “é unha organización de afiliación individual onde todas as opinións individuais ou colectivas son igual de lexítimas e onde as decisións son adoptadas democraticamente pola militancia sobre a base de unha persoa/un voto”.
Un camiño que leva á liberación nacional e social
“O camiño que escollemos non é fácil, pero é certo e é o único posíbel para nos conducir ao noso obxectivo. O nacionalismo que hoxe representa o BNG é a resposta da auto-organización do pobo galego para traballar pola liberación nacional e social. Esta é unha das nosas fortalezas”, subliñou. “Imos de lonxe e imos para lonxe. O noso obxectivo é a soberanía e a independencia da nosa nación para construír unha sociedade nova, democrática, xusta igualitaria e libre. Non nos vai deter un revés no camiño, nin o desánimo”, asegurou. De aí que advertise de que “traballaremos nas eleccións xerais con ilusión e entusiasmo” e lembrou que "o obxectivo final é máis grande e profundo que uns comicios: conquistar a liberación social e nacional de Galiza”.
"Non nos vai deter un revés electoral nin o desánimo no camiño cara á liberación nacional e social da Galiza"
Néstor Rego rematou a súa intervención como comezou, tomando emprestadas as palabras do poeta nacional, Manuel María, que estivo moi presente neste XIV Congreso da UPG e cuxo nome espertou o entusiasmo do auditorio.
Ana Pontón: Non hai no Estado ningunha nación que precise máis o nacionalismo que Galiza
Antes da intervención de clausura por parte do secretario xeral da UPG, tomou a palabra a portavoz nacional do BNG, Ana Pontón, quen reivindicou que “non hai nada máis rupturista que ser nacionalista” e quen salientou que o Bloque “promove a unión de todos e todas as que queren ser galegas no mundo”.
Pontón apelou a ter “confianza no proxecto e no país, en Galiza e nas súas xentes"
Pontón asegurou que “non hai no Estado ningunha nación que precise máis o nacionalismo que Galiza” e reclamou “que as dificultades non nos paralicen, pois deben ser alento e aliciente para mellorar o que facemos”. Tamén apelou a ter “confianza no proxecto e no país, en Galiza e nas súas xentes”. E finalizou cunha chamada á implicación de todos e de todas “con ilusión e optimismo” nos “retos que temos por diante”.
Membros do Comité Central
Segundo o acordado polo conxunto da militancia da UPG, os membros do novo Comité Central do partido son os seguintes:
Antón Álvarez Merayo
Alberte Ansede Estraviz
Manuel Caride Correa
Paulo Simón Carril Vázquez
Xosé Manuel Carril Vázquez
Xosé Manuel Casal Sabín
Rubén Cela Díaz
Marcos Conde Farto
Duarte Correa Piñeiro
Manuel Da Cal Vázquez
Marta Da Costa Alonso
Carme Da Silva Méndez
Ana Ermida Igrexas
Dores Fernández Abel
Ramón Fernández Alfonzo
Alberte Fernández Silva
Xosé Ferreiro Fernández
Tareixa Antía Ferreiro Tallón
Iria Figueroa Torres
Xabier Filgueira Domínguez
Anxela Franco Pouso
Xesús García Couso
María Pilar García Negro
Xacobe García Souto
Francisco García Suárez
Xoán Carlos Garrido Couceiro
Daniel Gómez Rodríguez
Demetrio Gómez Xunqueira
Xosé Ramón González Lousada
Anabel Gulías Torreiro
Anxo Igrexas Covelo
Rafael Igrexas García
Francisco Joquera Caselas
Xosé Antón Ledo Pan
Bieito Lobeira Domínguez
Cristina López Sánchez
Diego Lourenzo Moura
Anxo Louzao Rodríguez
Ignacio Louzao Rodríguez
Marcos Maceira Eiras
Belén Martínez Portela
Andrea Martíns Fernández
Xosé Manuel Méndez Díaz
Susana Méndez Rodríguez
Alberte Mera García
Lois Neto López
Montse Nóvoa Gómez
Serafín Outeiro Fernández
Ana Isabel Paz Vilar
Rosana Pérez Fernández
Xabier Pérez Igrexas
Elisa Pérez Vázquez
Manuel Polo Gundín
Cosme Eladio Pombo Rodríguez
Montse Prado Cores
Elsa Quintas Alborés
Néstor Rego Candamil
Xosé Regueira Varela
Iván Ribas Rico
Elia Rico Lagarón
Adrián Rodríguez Bravo
Manuela Rodríguez Pumar
Francisco Rodríguez Sánchez
Iria Salvande Lourenzo
Silvia Seixas Naia
Xesús Seixo Fernández
Elías Somoza Regueiro
Xesús Soto Viveiro
Almudena Taboada Castro
Mercedes Tobío Rodríguez
Xosé Fernando Varela Parada
Antonio Veiga Outeiro