—Que balance fai dos 24 anos que leva á fronte do Goberno de Pontevedra? Como mudou a cidade neste tempo?
Conseguimos transformar unha cidade gris, triste, enferma... onde era difícil vivir, nunha cidade amable, dinámica, segura, accesible, respectuosa co medio, nunha cidade referente no mundo e da que todos os pontevedreses e pontevedresas se senten orgullosas.
Adiantamos a problemas e solucións que despois nos venderon e seguen a vender dende Madrid como “modernidades”: Recuperación da memoria histórica, avance nos novos sectores da economía, rexeneración e posta en valor do patrimonio cultural e ambiental e outros varios nos que fomos pioneiros con décadas de adianto.
Na Galiza fomos quen de buscar as nosas propias solucións e ter un modelo de cidade, unha forma de vivir a cidade do máis avanzado do mundo.
—No caso de continuar na Alcaldía após as eleccións, cales serían as actuacións prioritarias do seu Goberno e que retos cre que ten a cidade por diante?
Avanzar, avanzar, avanzar, se cabe con maior ritmo e decisión. Avanzar por un camiño xenuinamente galego, por un camiño xenuinamente pontevedrés, mirando o mellor que se fai no mundo, pero sempre adaptado e integrado na nosa realidade. Avanzar en ter unha cidade e un rural de elevada calidade de vida. Avanzar en que todas as veciñas e veciños de Pontevedra sexan tratados coa máxima equidade. Avanzar en lograr que Pontevedra sexa referente mundial en cada vez máis ámbitos. Estimular e aproveitar a explosión de creatividade. Avanzar nun concello con un grande dinamismo social, económico, cultural e deportivo, pondo en valor todas as nosas potencialidades, vendo Santa Clara, A Ría, A Xunqueira, o Monte, a pleno rendemento. Avanzar nunha nova xeira de infraestruturas e de ver rematada a Circunvalación. Avanzar nunha ecoloxía urbana de vangarda, da economía circular e de outras medidas contra o cambio climático. E converter ao Museo de Pontevedra no que sempre debeu ser, o Museo Nacional de Galiza.
Mentres o BNG goberne o Concello utilizaremos todos os medios ao noso alcance para recuperar a ría
—O Tribunal Supremo vén de avalar a permanencia de en Lourizán, unha cuestión que desde hai anos divide á cidade. Debe o Concello abandonar a vía xudicial e acatar a sentenza, priorizando o argumento do emprego xerado directa e indirectamente, ou ben continuar a loita nos tribunais, tendo en conta o dano ambiental que segue a causar na ría?
Nós xa dixemos que mentres o BNG goberne o Concello de Pontevedra utilizaremos todos os medios que estean ao noso alcance para conseguir ver a ría recuperada e a disposición de todos os veciños e veciñas. De feito, xa temos presentado un incidente de nulidade contra a sentenza do Supremo e contratado un bufete de avogados especializado que, xunto cos servizos xurídicos municipais, están estudando todas as vías abertas.
É unha cuestión de principios e nunca renunciaremos nin desistiremos, por moito Tribunal Supremo e moito poder fáctico en conivencia co P.P. que teñamos enfronte. O de pregarse aos seus designios é cousa do PP e PSOE, nunca do BNG.
—Que medidas adoptaría en materia de promoción do emprego?
Pois todas as que están ao alcance do Concello. Sempre digo que se a Xunta do P.P. nos traspasara as competencias e os recursos, Pontevedra sería unha potencia enorme económica.
Se, coas limitadas competencias e cos escasos recursos, temos actualmente máis de 50.000 postos de traballo para unha poboación de 83.000 habitantes, se a Xunta colaborara ou transferira as competencias e os cartos, Pontevedra sería imparábel economicamente e en creación de emprego. No BNG sabemos como dinamizar economicamente as cidades e vilas de Galiza. A pesares das trabas da Xunta, somos quen de facelo.
Nin teremos que comprar coche novo nin pagar para circular na cidade
—Como ve a situación en canto a mobilidade urbana na cidade de Pontevedra?
Pontevedra atópase neste momento nunha situación privilexiada: é unha das moi poucas cidades do Estado co seu PMUS aprobado e a súa ZBE xa deseñada e ratificada, na que nin teremos que comprar coche novo nin pagar para circular na cidade, e iso é porque levamos máis de 20 anos facendo os deberes no que ten que ver coa mobilidade sustentable. E nesta dirección seguiremos avanzando.
Equidade elevada e capacidade de deseñar e aplicar solucións avanzadas e novidosas mostradas na práctica.
—Cales son as súas propostas relativas aos servizos sociais?
Desde o BNG entendemos que os servizos sociais deben ser un dereito universal, e que polo tanto, debería estar garantido o seu acceso pola Xunta, que é quen ten as competencias.
Máis alá diso, o Concello fará todos os esforzos para garantir uns servizos sociais de calidade, coidando especialmente aos maiores, con programas interxeracionais, priorizando o Servizo de axuda no fogar, afortalando e traballando co tecido de entidades sociais existentes, impulsando os programas de inserción social, a Unidade de axuda á drogodependencia...Porque se algo ten Pontevedra é que é unha cidade que coida á súa veciñanza, desde a infancia á vellez.
Quen se dea unha volta por Pontevedra percibirá inmediatamente esas “infraestruturas verdes”, pero xenuínas e axeitadas á nosa realidade
—O impulso de infraestruturas ‘verdes’ en núcleos urbanos está na axenda de moitos Gobernos de cidades. Que opina en termos de infraestruturas no Concello de Pontevedra e acerca das necesidade de impulsar políticas ‘verdes’.
Levamos 24 anos impulsando o que hoxe chaman políticas e “infraestruturas verdes”. Neste campo tamén levamos décadas de adianto porque unha das compoñentes básicas do nacionalismo galego é a defensa e posta en valor do noso medio. Quen se dea unha volta por Pontevedra, tanto pola cidade como polo rural, percibirá inmediatamente esas “infraestruturas verdes”, pero xenuínas e axeitadas á nosa realidade, bastante diferentes ás propostas serodias que circulan con solucións alleas (madrileñas ou levantinas) e disfuncionais que tenta poñer de moda a “progresía” española.