Marea de Vigo rexistrou esta quinta feira unha solicitude no Concello de Vigo para que se proceda á retirada da denominación Praza do Rei ao espazo ocupado precisamente pola casa consistorial. Reclaman que a praza recupere o seu topónimo anterior: Campo de Granada.
O portavoz da Marea de Vigo, Rubén Pérez, e mais a concelleira Oriana Méndez, asinan esta petición á atención do alcalde vigués, Abel Caballero, na que motivan a súa demanda pola inminente apertura dunha investigación a Juan Carlos I por parte da Fiscalía do Tribunal Supremo "polas supostas comisións ilegais cobradas a partir da adxudicación a empresas españolas das obras do chamado AVE á Meca".
Así mesmo, na súa solicitude instan a Caballero a sacar da recepción do Concello o busto en pedra do rei honorífico e inciden no feito de que Juan Carlos I está a ser "investigado por múltiples delitos de corrupción".
Xa no pasado mes de marzo, o BNG reclamara a retirada do busto do monarca da familia dos Borbóns ao coñecer as presuntas irregularidades relacionadas con cobros millonarios de Arabia Saudita. "O comportamento do monarca emérito merece do reproche e da censura social", argumentou no momento o concelleiro nacionalista Xabier P. Igrexas.
