![[Imaxe: Xunta] Visita aos terreos do centro de saúde do Couto](/asset/thumbnail,1280,720,center,center/media/nosdiario/images/2016/09/04/2016090414454316358.jpg)
En Marea advirte da existencia de “presións” por parte do Partido Popular para que se abra o novo centro de saúde do barrio ourensán do Couto en plena campaña electoral, algo contrario “á legalidade e aos propios informes técnicos municipais”, segundo advirte nunha nota de imprensa.
A formación asegura que o concelleiro de Urbanismo de Ourense tiña afirmado que a legalidade “obrigaba a acondicionar o entorno” e “fixaba para 2017 a data de apertura”. “A pretendida apertura por parte da Administración autonómica sen agardar pola urbanización do entorno amosa que ou ben non visitaron o recinto e as condicións nas que se atopa ou que alguén está a presionar para axilizar o trámite de apertura”, engade En Marea.
"Estamos perante un gravísimo uso partidista das institucións por parte do Partido Popular na Xunta de Galiza"
![Publicidade 195634]()
Para En Marea, “estamos perante un gravísimo uso partidista das institucións por parte do Partido Popular na Xunta de Galiza, quen despois de recortar un 20% o orzamento da sanidade pública en sete anos, eliminar 500 camas nos hospitais, aumentar as listas de espera, colapsar as urxencias e recortar 1800 prazas de persoal médico, pretendía empregar a apertura deste centro de saúde para promover a súa campaña electoral”.
A forza política refírese a Alberto Núñez Feijóo como “o presidente da Xunta de Galiza que pasará a historia por ser acusado de homicidio por retirar fármacos a enfermos de hepatite C e pretendía agochar a súa xestión en contra da sanidade pública presionando para inaugurar un Centro de Saúde en obras e aínda sen licenza de apertura”.
