Gómez-Reino pon de manifesto nun comunicado de imprensa que “os 22 hospitais privados de Galiza contan con 2.285 camas, 23% do total. A prioridade da Xunta debe ser empregalas xa para enfrontar a epidemia antes de propor a construción de hospitais de campaña”, dixo.
Os datos da Asociación de Hospitais de Galicia (Ahosgal), sinala Galicia En Común, “poñen de manifesto a relevancia que cobraron os recursos privados no sistema sanitario de Galicia durante os Gobernos de Feixoo”. De feito, din, centros e clínicas privadas realizan o 26,5% da atención hospitalaria e sanitaria da Galiza.
Ademais, Gómez-Reino cifra en 563 o persoal sanitario que compaxina a actividade privada coa pública e en 1.744 os profesionais da enfermaría. “Só os hospitais integrados en Ahosgal suman 73 boxes de Urxencias, 82 quirófanos, 56 salas especiais, 14 equipos de tomografía axial computerizada ( TAC) e 18 para resonancias magnéticas”.
“Todos eses recursos materiais e humanos en mans privadas terían que estar xa ao dispor da loita contra a COVID-19. Non ten sentido que antes de empregalos, a Xunta se propoña levantar hospitais de campaña para derivar alí pacientes que estarán obxectivamente en peores condicións que neses centros”, afirma Gómez-Reino.
