Unha delegación de Herrira, movemento de solidariedade para cos presos políticos vascos, estivo estes días na Galiza, onde mantivo xuntanzas con diferentes organizacións e entidades, como o sindicato CIG, o BNG ou co grupo parlamentar de Alternativa Galega de Esquerdas, entre outros. A presenza na Galiza de Herrira procura dar a coñecer e explicar a cidadanía galega a realidade da situación que están a padecer os presos vascos.
Supresión da Doutrina Parot
Entre as súas reivindicacións, Herrira reclama a supresión da doutrina Parot entendendo que contravén os dereitos humanos.Con este motivo puxo en marcha unha campaña a nivel internacional para denunciar as consecuencias da súa aplicación.A doutrina Parot está a provocar que da orde de 70 presos que poderían estar xa na rúa sigan a cumprir condena superando xa mesmo os 30 anos de cadea.
Herrira reclama ademais a excarceración dos presos gravemente enfermos para o axeitado tratamento das súas enfermidades.
Polo diálogo e coa maioría social de Euskal Herria
A prioridade de Herrira é a construción dun espazo político de diálogo e a defensa do respecto aos dereitos humanos dentro das cadeas. Defínese como movemento popular de carácter plural e conta co apoio da maioría social en Euskal Herria.
