As fontes consultadas por Sermos indican que na reunión se adoptou, por consenso, o acordo de lle pedir a Quinteiro que saíse en público a oferecer as súas desculpas e a condenar os actos vandálicos. Foi o que fixo a parlamentar de Podemos-Anticapitalistas. "Damos por boa esa petición de desculpas", dixo esta quinta feira Eva Solla, vicepresidenta segunda da Cámara e coordenadora nacional de Esquerda Unida.
A surpresa para as e os integrantes do grupo parlamentar foi total cando coñeceron a noticia de que esa mesma cuarta feira a coordenadora de En Marea -órgao liderado por Luís Villares, portavoz tamén no Pazo do Hórreo- daba traslado ao Consello das Mareas da petición de demisión de Paula Quinteiro.
"A demisión nunca estivo sobre a mesa [do grupo parlamentar]. Sería un castigo totalmente desproporcionado. A petición de desculpas e a condena dos actos vandálicos é o que compría facer e é o que fixo Paula [Quinteiro]", din as fontes do grupo parlamentar de En Marea a Sermos.
Todo está agora pendente do que poda decidir ao respeito o Consello das Mareas, máximo órgao da confluencia entre plenarios. Reúnese a partir das 18 horas. Decidir o que decidir, a líder de Podemos na Galiza, Carmen Santos, quen mostrou o seu apoio a Quinteiro "como compañeira e como persoa", afirmou esta quinta feira que a decisión sobre se demite ou non lle corresponde en exclusiva á deputada.
