Gómez Reino aproveitou a entrevista dominical da SER para pór no albo das súas críticas Luís Villares. A súa liña de argumentación, que baixo a lideranza do xuíz en excedencia En Marea é percibida pola xente como un partido convencional, que é o contrario do que a base social rupturista demandaría da organización.
"A xente non nos pide que fagamos un partido clásico, a xente pídenos que fagamos unha marea, un espazo onde todo o mundo estea cómodo e sume maiorías, porque é imprescindíbel que agrandemos posicións e sumemos máis xente se queremos desprazar o PP da Xunta", dixo.
Nun ton discursivo moi próximo ao manexado estes días por Martiño Noriega, o líder da Mesa da Confluencia que disputa o poder orgánico a Villares, Gómez Reino pediu ao portavoz da confluencia que reflexione após os resultados deitados polo recente plenario do partido instrumental. "Cando un dirixente, nun proceso interno; [ve que as] súas teses non son refrendadas pola maioría, senón ao contrario, o que ten que facer é reflexionar", afirmou o novo referente orgánico de Podemos Galicia.
Sobre o futuro de Villares, e após afirmar que o político de Lugo está a facer "un bon traballo" como voceiro parlamentar, Gómez Reino considera que "sempre é unha posibilidade" que se vexa obrigado a abandonar a portavocía se finalmente a súa listaxe é derrotada nas primarias.
O sector crítico defende a non compatibilidade entre as portavocías orgánica e parlamentar, un dos asuntos que alimentou a crise entre Luís Villares e os seus antigos aliados.