Por “petición expresa de parte importante dos cargos orgánicos”. Así xustificou Antón Gómez Reino, man dereita de Pablo Iglesias na Galiza, a disolución da dirección galega de Podemos. Negou, en repetidas ocasións diante dos medios de comunicación, que o desmantelamento da cúpula galega de Podemos se debese ás presións de Madrid.
O deputado explicou que a xestora da que é máximo responsábel o senador García Buitrón foi creada dado o que chamou “situación de bloqueo do diálogo que hai en Podemos” na Galiza. Ademais, criticou que o aínda secretario xeral, Breogán Riobóo, estiver “completamente fechado a calquera tipo de diálogo” e "nun percorrido diferente" . “Atopabámonos nunha situación na que se impugnaba sistematicamente o que era votado democraticamente”, explicou.
Preguntado polas eleccións primarias para a designación da Secretaría Xeral, Gómez Reino non desbotou presentarse. Así, asegurou que está “para todo o que poida en Podemos Galiza. E se a partir de aí se entende que eu podo achegar calquera cuestión, sexa de menor ou maior relevancia, pois estarei disposto a valoralo”.
En Marea
Gómez Reino ofreceu estas declaracións após a conferencia de imprensa na que En Marea instou o PSOE a impulsar "un goberno de cambio e realmente progresista", algo que, advertiu Alexandra Fernández, portavoz de En Marea, é "incompatíbel" cun proxecto do que forme parte Ciudadanos.
Alexandra Fernández criticou que o PSOE "só trate de gañar tempo para si mesmo" e lembrou que En Marea "segue coa man tendida na aposta en común cara a un cambio que derive nun proceso de transformación profunda".