A Garda Civil denunciou a 2 militantes do BNG esta segunda feira após identifical@s e cacheal@s por se atoparen nas inmediacións de Cambre pintando un mural na defensa do dereito ao aborto. A acción, que toma parte da campaña que desenvolve a organización frontista nivel nacional como resposta ao anteproxecto de lei de reforma presentado polo goberno español, rematou co levantamento dun atestado por parte do Instituto armado na que denuncian @s responsábeis da formación por un suposto delito de faltas.
Daniel Carballada --concelleiro municipal e integrante de Galiza Nova-- e Vitoria Louro --responsábel comarcal de Acción Feminista do BNG-Coruña-- participaban da pintada xunto cun grupo de militantes que foron tamén "identificados e cacheados", indican desde a organización frontista. Aliás, fóronlles incautados os úteis empregados para a elaboración do mural situado nun muro de contención lateral da estrada Nacional VI á altura do Seixal, na parroquia do Temple.
"Queren amordazar e criminalizar o dereito a manifestar publicamente opinións"
Desde o Bloque critican con dureza a actuación da Garda Civil no que consideran constitúe un "acto de criminalización" da resposta social. "Con este tipo de procedementos o Estado español retrátase como o que é, un imperio decadente", apuntou Vitoria Louro, ao tempo que denunciou a actitude das forzas de seguridade do Estado das que dixo "teñen que facer uso e abuso do manual de estilo da ditadura franquista para reprimir e someter as voces discrepantes co seu ideal neofascista, que ataca especialmente as mulleres”.
Aliás, o concelleiro nacionalista, Daniel Carballada, criticou con dureza que se leve "diante dun xuíz" unha acción que enmarcou na defensa "dun dereito básico das mulleres" en troca doutros delitos.
Para a organización frontista este feito inscríbese nos "continuos esforzos por parte do PP de calar a voz da cidadanía, promovendo leis propias dun estado de excepción e redobrando esforzos e recursos en amordazar e criminalizar a xente que exerce o seu dereito a manifestar publicamente a súa opinión" e afirman que actitudes coma esta "non fan máis que acrecentar o compromiso do BNG cunha democracia activa e horizontal, transparente e participativa".
Após pasaren a disposición xudicial, Carballada e Louro podería enfrontar un xuízo de faltas.