venres 07/08/20

“Desde Galicia ningún partido debe sentar as bases do xogo, pero desde o Estado Español tampouco”

Reproducimos a seguir un artigo enviado a Sermos pola Comisión Cidadá pola Unidade no 25 de Xullo, impulsora tamén do Banquete 2.0 que irá decorrer este domingo na praza Aurelio Aguirre de Conxo. O artigo leva por título Os primeiros pasos do camiño.

Conferencia de imprensa da Comisión previa ao Día da Patria Galega.
Conferencia de imprensa da Comisión previa ao Día da Patria Galega.

Moito se leva falado e reflexionado nos últimos meses sobre a posibilidade dunha candidatura de confluencia de cara ás eleccións xerais e galegas. Nun primeiro chanzo, co obxectivo dun grupo parlamentario propio no Congreso dos Deputados, nun segundo, como alternativa sólida ás políticas populares en Galicia. Na primeira cuestión, moi probablemente, o único xeito de que cadraran os números sexa cunha plataforma ampla que dea acubillo ás demandas sociais dun país que se desangra entre o paro, a emigración e o desmantelamento xeral do Estado do Benestar. E é ben sabido que as sociedades sumidas na aporía son especialistas en darlle saída con diversas iniciativas ás súas coitas (se ben isto non garante a disolución da aporía).

O que non debe ficar fóra do foco é que a sociedade galega é unha sociedade dinámica que xa ten tecida unha ampla rede municipalista, cultural, deportiva, veciñal, sindical que, xunto con diversos proxectos xurdidos recentemente, demandan unha alternativa galega de base, creada desde a cidadanía. Evidentemente, alén disto, tamén hai partidos, mareas e alternativas políticas que cavilan sobre esta posibilidade.

Tras o Banquete, o compromiso é o de promover xuntanzas en todos os puntos de Galicia

Por iso, facendo lembranza ao 2 de marzo de 1856, data do máis transcendental acto de irmandade da historia recente de Galicia convocamos este domingo 23 de agosto a todas esas persoas que se sintan interpeladas,  aos movementos e colectivos, á mocidade para, entre todos, ter a oportunidade para establecer as bases de funcionamento que conteñan uns principios mínimos de democracia de base e transparencia e, deste xeito, aportar as consideracións postas en común ao proceso. E desde Galicia ningún partido debe sentar as bases do xogo, pero desde o Estado Español tampouco. Hai que ter altura de miras e xogar sen imposicións e con xenerosidade.Tras o Banquete, o compromiso é o de promover xuntanzas en todos os puntos de Galicia

O obxectivo fundamental é o de ser quen de iniciar unha vaga de conciencia colectiva que sustente un suxeito político que dea solucións e xestione e acompañe institucionalmente o noso futuro colectivo. Pero para isto é fundamental que sexa unha candidatura galega, que defenda os intereses da inmensa maioría da sociedade, e que sosteña que, no que atinxe a Galicia, é Galicia quen decide, e que polo tanto, como nación ten dereito a decidir. Desde SOS Sanidade Pública ata as protestas na educación. Desde o lumes nunca máis ata as protestas dos estaleiros, o país precisa estar representado nas próximas Cortes do Estado Español.

"Novos vieiros e novos pés para camiñalos. Son precisos sitios comúns e persoas mozas que abran as portas"

Evidentemente, tras o Banquete, o compromiso é o de promover xuntanzas en todos os puntos de Galicia. Queremos que o Banquete sexa un dos primeiros pasos do camiño polo cal Galicia chegue a un novo tempo histórico. Un tempo de relevancia. Novos vieiros e novos pés para camiñalos. Son precisos sitios comúns e persoas mozas que abran as portas. Permitir que esta, se cadra, última oportunidade se frustre obedecerá a falta de miras e, probablemente, a xenreiras persoais e agravios pasados."Novos vieiros e novos pés para camiñalos. Son precisos sitios comúns e persoas mozas que abran as portas"

Chamamos por todas e todos, sen exclusións nin condicións previas, para sentar as bases da ferramenta que nos serva para, social, política e institucionalmente, vehiculizar o feito diferencial galego e as demandas (que non son poucas) dunha sociedade empobrecida e esquilmada. Traballo, xenerosidade, irmandade e Galicia.

comentarios